QR Aqparat jáne qoǵamdyq damý ministri Dáýren Abaev «Nur Otan» partiiasynda qoǵamdyq qabyldaý ótkizdi. Qabyldaý kezinde «Kel, kelinim», «Qalaýlym» jáne «Óz oiym» baǵdarlamalardyń máselesi kóterildi, dep habarlaidy QazAqparat tilshisi.
Almatydan beinebailanysqa shyqqan jýrnalist Bibigúl Ysqaqova atalǵan jobalardyń jastar tárbiesine keri áser etip jatqanyn jetkizdi.
«Búginde telearnalar reitingtiń quly bolyp ketti. Sonyń biri - 7-shi arnadaǵy «Óz oiym» baǵdarlamasy. Ony túski saǵat 15:00-de kórsetedi. Ol kezde úide otyrǵan áielder men apalar kóredi. Balalar da kóredi. Ózim kórip edim, sumdyq baǵdarlama eken. Shetelde talai ret boldym, túski ýaqytta ondai masqarany kórgen emespin. Máselen, Reseidegi «Dom-2»-nyń ózin túnde kórsetedi. Al bizdegi «Óz oiym»-dy túste kórsetip, jynystyq qatynas týraly ashyq aitady», - dedi B.Ysqaqova.
Osy oraida jýrnalist naqty mysaldardy da keltirip, ondai baǵdarlamalardyń jastar tárbiesine qanshalyqty keri áser etetinin jetkizdi. Búginde kórermender de jii aryzdanady, ondai jobalardyń mazmunyna basa nazar aýdarýdy suraidy.
QR Aqparat jáne qoǵamdyq damý ministri Dáýren Abaev óz kezeginde jýrnalistiń azamattyq ustanymyn quptap, ondai syn-eskertýlerdi jii aitý kerektigin jetkizdi.
«Birinshiden, bul jekemenshik arna. Men ministr retinde tek terrorizm nemese balalarǵa qarsy bir teris kontent bolsa ǵana aralasyp, ondai úgit-nasixatqa áser ete alamyz. Áitpese, tsenzýra bolyp ketedi. Máselen, qazir sizder maǵan «Óz oiym», «Qalaýlym» siiaqty baǵdarlamalardy nege jappaisyz dep ursasyz da, al osy jerden shyqqannan keiin meni sóz bostandyǵyna shekteý qoidy dep synaidy. Sol sebepti bul jerdegi basty másele - kórermenniń qalaýy. Sebebi árbir ata-ananyń qolynda, balanyń qolynda teledidardyń pýlti bar. Qandai baǵdarlama kóretinimizdi ózimiz tańdaýymyz qajet. Ekinshiden, ata-analardyń jaýapkershiligi de bar. Balalar qandai arnany kórip otyr? Qandai áleýmettik jelilerde otyrady? Osyny ata-analar baqylap otyrýy qajet», - dedi D.Abaev.
Ministrdiń sózine qaraǵanda, buǵan deiin 7 arnanyń basshylyǵy men baǵdarlama avtorlarymen kelissózder boldy. Oǵan sáikes, baǵdarlamalardyń mazmuny durys bolýy kerek.
«Máselen, «Qalaýlymdy» alaiyq, endi, men ózim kórmeimin, biraq maǵan aitty, qazirgi baǵdarlamalary kúrt ózgertip jatyr. Osy «Qalaýlym» basynda shyqqanda qandai boldy, qazirgi taqyryptary basqasha. Sol siiaqty «Óz oiym» da birte-birte qalypqa keledi dep oilaimyn», - dep atap kórsetti D.Abaev.
