QR Tsifrlyq damý, innovatsiialar jáne aeroǵarysh ónerkásibi ministri Asqar Jumaǵaliev «Báiterek» ǵarysh kesheninde qandai tasymaldaǵysh zymyrandar paidalanylatynyn aitty, dep habarlaidy "Ult aqparat".
«Hattamanyń birinshi babynda «Báiterek» kesheni ekologiialyq qaýipsizdik deńgeii joǵary tasymaldaǵysh zymyrandardy ushyrýǵa arnalatyny atap ótilgen. Osyǵan bailanysty «Báiterek» kesheninen ushyrý úshin qandai tasymaldaǵysh zymyrandar qoldanylady?», - dep surady depýtat Bekbolat Tileýhan Parlament Májilisiniń jalpy otyrysynda.
Óz kezeginde ministr A. Jumaǵaliev «Proton» ekologiialyq jaǵynan tiimsiz ekenin, óitkeni bul tasymaldaǵysh zymyranda geptil otyny paidalanylatynyn jetkizdi.
«Soiýz-5» tasymaldaǵyshynda geptil otyny paidalanylmaidy, iaǵni onda ottegi men kerosin otyny bolady. Osy oraida ekologiialyq jaǵynan áldeqaida tiimdirek. Bul rette ekologiialyq turǵyda másele týyndamaidy. Sonymen qatar, kommertsiialyq jaǵynan «Soiýz-5» zymyryn tasymaldaǵyshy «Protonmen» salystyrǵanda tiimdi», - dedi Asqar Jumaǵaliev.
Budan buryn habarlanǵandai, Májilistiń jalpy otyrysynda «2004 jylǵy 22 jeltoqsandaǵy QR Úkimeti men RF Úkimeti arasyndaǵy «Baiqońyr» ǵarysh ailaǵynda «Báiterek» ǵarysh zymyran keshenin qurý týraly kelisimge ózgerister men tolyqtyrýlar engizý týraly hattamany ratifikatsiialaý týral» zań jobasy maquldandy.
Osy jobada Resei tarapy «Soiýz-5» zymyrandy, tehnikalyq jáne starttyq keshenderinde baqylaý-tekserý jabdyqtaryn qurýdy, sondai-aq údemeli bloktyń tehnikalyq keshenin, ǵarysh apparatyn jáne ǵaryshtyq bastiek bóligin jańǵyrtýdy qamtamasyz etedi. Osy jumystar 916 mln AQSh dollary somasynda baǵalandy. Jańǵyrtý maqsatynda 2018 jyly «Baiqońyr» ailaǵynyń 42,43 jáne 45-shi alańdarynda ornalasqan «Zenit-M» kesheniniń 243 nysany Qazaqstan tarapyna berildi. Qazaqstan tarapy «Zenit-M» kesheniniń jerústi infraqurylymy nysandaryn qaita jańartý men jańǵyrtý jumystaryn júrgizedi.
