Sýret: Habar 24
Keiingi aptada UBT tapsyrý kezinde 21 adam ereje buzǵan. Bul týraly Ulttyq testileý ortalyǵynyń direktory Rýslan Emelbaev Instagram-paraqshasynda aitty, - dep habarlaidy Tengrinews.kz.
Ol UBT-daǵy árbir joǵary nátije jiti qadaǵalanatynyn atap ótti.
"Biz UBT-daǵy árbir joǵary nátijeni tekseremiz. Keiingi aptada testileý kezinde erejelerdi buzǵany úshin aýditoriiadan 21 adam shyǵarylyp, nátijeleri joiyldy", - dedi Rýslan Emelbaev.
Sonymen qatar, UTO direktory joǵary nátije kórsetken talapkerlerdi qaita baqylaý barysynda erekshe nazarǵa ilikken testilenýshige toqtaldy.
"Test tapsyrýshy qańtarda - 72 ball, al negizgi UBT-da 130 ball jinaǵan. Nátijesi birden 58 balǵa ósken, sondyqtan qosymsha kúsheitilgen baqylaý ótkizýdi jón kórdik. Beinejazbalardy tekserý barysynda talapkerdiń UBT erejelerin buzǵany belgili boldy. Ol testileý barysynda beinekamera men miniqulaqqap qoldanǵan. Buǵan jol bergen qyzmetshi testileýden shettetildi. Qyzmettik tekseris júrgizilip, tiisti shara qoldanylady. Al test tapsyrýshynyń nátijeleri joiyldy. Ol endi ekinshi múmkindigin qoldana almaidy", - dedi ol.
UTO basshysy Rýslan Emelbaev oqýshylarǵa júieni aldaýǵa tyrysýdyń qajeti joǵyn aityp, jaýapkershilikten eshkim qutyla almaitynyn túsindirdi.
"Sizderdi taǵy da akademiialyq adaldyqty saqtaýǵa shaqyramyn. Al biz baqylaýdy odan ári kúsheitemiz", - dep túiindedi ol.
