سۋرەت: حابار 24
كەيٸنگٸ اپتادا ۇبت تاپسىرۋ كەزٸندە 21 ادام ەرەجە بۇزعان. بۇل تۋرالى ۇلتتىق تەستٸلەۋ ورتالىعىنىڭ ديرەكتورى رۋسلان ەمەلباەۆ Instagram-پاراقشاسىندا ايتتى, - دەپ حابارلايدى Tengrinews.kz.
ول ۇبت-داعى ەربٸر جوعارى نەتيجە جٸتٸ قاداعالاناتىنىن اتاپ ٶتتٸ.
"بٸز ۇبت-داعى ەربٸر جوعارى نەتيجەنٸ تەكسەرەمٸز. كەيٸنگٸ اپتادا تەستٸلەۋ كەزٸندە ەرەجەلەردٸ بۇزعانى ٷشٸن اۋديتورييادان 21 ادام شىعارىلىپ, نەتيجەلەرٸ جويىلدى", - دەدٸ رۋسلان ەمەلباەۆ.
سونىمەن قاتار, ۇتو ديرەكتورى جوعارى نەتيجە كٶرسەتكەن تالاپكەرلەردٸ قايتا باقىلاۋ بارىسىندا ەرەكشە نازارعا ٸلٸككەن تەستٸلەنۋشٸگە توقتالدى.
"تەست تاپسىرۋشى قاڭتاردا - 72 بالل, ال نەگٸزگٸ ۇبت-دا 130 بالل جيناعان. نەتيجەسٸ بٸردەن 58 بالعا ٶسكەن, سوندىقتان قوسىمشا كٷشەيتٸلگەن باقىلاۋ ٶتكٸزۋدٸ جٶن كٶردٸك. بەينەجازبالاردى تەكسەرۋ بارىسىندا تالاپكەردٸڭ ۇبت ەرەجەلەرٸن بۇزعانى بەلگٸلٸ بولدى. ول تەستٸلەۋ بارىسىندا بەينەكامەرا مەن مينيقۇلاققاپ قولدانعان. بۇعان جول بەرگەن قىزمەتشٸ تەستٸلەۋدەن شەتتەتٸلدٸ. قىزمەتتٸك تەكسەرٸس جٷرگٸزٸلٸپ, تيٸستٸ شارا قولدانىلادى. ال تەست تاپسىرۋشىنىڭ نەتيجەلەرٸ جويىلدى. ول ەندٸ ەكٸنشٸ مٷمكٸندٸگٸن قولدانا المايدى", - دەدٸ ول.
ۇتو باسشىسى رۋسلان ەمەلباەۆ وقۋشىلارعا جٷيەنٸ الداۋعا تىرىسۋدىڭ قاجەتٸ جوعىن ايتىپ, جاۋاپكەرشٸلٸكتەن ەشكٸم قۇتىلا المايتىنىن تٷسٸندٸردٸ.
"سٸزدەردٸ تاعى دا اكادەمييالىق ادالدىقتى ساقتاۋعا شاقىرامىن. ال بٸز باقىلاۋدى ودان ەرٸ كٷشەيتەمٸز", - دەپ تٷيٸندەدٸ ول.
