Resei, Qytai jáne Iranmen bailanysty hakerler AQSh-ta aldaǵy ýaqytta ótetin prezident sailaýyna qatysy bar adamdar men toptardy ańdyp júr. Bul týraly beisenbi kúni Microsoft kompaniiasy habarlady. Kompaniianyń aitýynsha, tórt jyl buryn Demokratiialyq partiianyń serverin buzýǵa aralasqan hakerler endi sailaýǵa yqpal etýge tyrysyp jatyr.
"Syrttan belsendilik artyp keledi, sailaý protsesine yqpal etýge kúsh salǵan áreketter kóbeidi" dedi Microsoft ókilderi.
Sarapshylardyń aitýynsha, hakerler ásirese prezident sailaýyna túsetin respýblikashyldar kandidaty Donald Tramp pen demokrattar usynǵan kandidat Djo Baidendi nysanaǵa alyp otyr.
Microsoft reseilik Strontium hakerler tobynyń 200-den astam uiymǵa kibershabýyl jasaýǵa tyrysqanyn aitady.
"2016 jyldaǵydai Strontium qoldanýshylardyń tirkeý derekterin urlaýǵa kúsh salyp otyr. Ázirge tolyq emes málimet boiynsha olar derekti arnaiy qyzmetke aqparat jinaýǵa kómektesý úshin nemese qaralaý kampaniiasyna paidalanǵysy keledi" dedi Microsoft kompaniiasynyń vitse-prezidenti Tom Bert.
Britandyq BBC saitynyń jazýynsha, Fancy Bear atpen de belgili Strontium tobyn sarapshylar reseilik áskeri barlaý qyzmetimen (GRÝ) bailanystyrady. Mamandardyń paiymdaýynsha, sol hakerler tobynyń britandyq saiasi partiialarǵa baǵyttalǵan kibershabýyldarǵa da qatysy bar. Degenmen Microsoft naqty qai saiasi partiialar ekenin ashyp kórsetpegen.
IT kompaniiasynyń málimetinshe, qytai hakerleri Djo Baiden ainalasyndaǵy adamdardy tóńirektese, Irannyń kiberalaiaqtary Aq úi jetekshisi Trampmen bailanysty adamdardyń kompiýterine shabýyl jasap jatyr. Microsoft málimetinshe, kibershabýyldardyń basym bóligi nátijesiz aiaqtalǵan.
Máseleden habary bar aqparat kózine súiengen Reuters agenttigi 10 qyrkúiekte Reseimen bailanysy bolýy múmkin hakerler amerikalyq SKDKnickerbocker konstalting kompaniiasyna kibershabýyl jasaǵanyn habarlady. Demokratiialyq partiia atynan sailaýǵa túsetin Djo Baidenniń shtaby osy kompaniiamen birge jumys isteidi. Reuters-tiń aqparat kóziniń aitýynsha, kompaniiaǵa shabýyl jasalatynyn buǵan deiin Microsoft mamandary eskertken.
Máskeý ózge elderdegi sailaýǵa qatysy bary týraly aiyptaýlardy únemi joqqa shyǵarady. 2016 jylǵy AQSh-taǵy prezident sailaýyna da qatysy joǵyn aitqan.
