Almatyda tutyný kooperativi retinde jumys istegen «R.O.I.» uiymyna qatysty qarjy piramidasyn uiymdastyrý kúdigimen tergeý júrip jatyr. Qazirdiń ózinde 275 adam jábirlenýshi dep tanylyp, keltirilgen shyǵyn kólemi 217 mln teńgege jetken, dep habarlaidy ult.kz.
Qarjylyq monitoring agenttiginiń málimetinshe, uiym ókilderi azamattardy jyljymaly jáne jyljymaityn múlik satyp alý baǵdarlamalaryna qatysýǵa shaqyrǵan. Osy maqsatta úlestik jarna jinaqtaý týraly kelisimsharttar jasalyp, turǵyndardyń aqshasy jinalǵan.
Alaida tergeý derekterine sáikes, jańa qatysýshylardyń qarajaty naqty kásipkerlikke jumsalmai, kooperativke buryn qosylǵan músheler aldyndaǵy mindettemelerdi óteýge baǵyttalǵan.
Agenttik habarlaǵandai, tergeý barysynda uiymdastyrýshylardyń keńes berý qyzmetiniń aqysy degen jeleýmen kooperativ qarajatynan 94 mln teńgeni ózderimen bailanysy bar tulǵalardyń, sonyń ishinde «Káýsar» jeke kásipkerliginiń esepshottaryna aýdarǵany anyqtalǵan.
Buǵan qosa, 2022 jyly sot daýlary bastalǵannan keiin Almatyda «ShynSaulet», «Berekeli Shanyrak», «Aya-Aru», «Jasmin», «USCoop» jáne «Baiterek» atty alty jańa tutyný kooperativi qurylǵan.
Tergeý nusqasy boiynsha, bul uiymdar «R.O.I.» kooperativi basshysynyń baqylaýynda bolǵan. Olar negizgi kooperativtiń jeke sot oryndaýshylary buǵattaǵan bank shottaryn ainalyp ótip, túsken qarajatty basqa esepshottarǵa aýdarý úshin paidalanylǵan.
Qarjy piramidasyn uiymdastyrdy degen kúdikke ilingen adam eki aiǵa qamaýǵa alyndy. Sot sanktsiiasymen úsh avtokólikke, 25 páterge jáne bank shottaryna tyiym salyndy.
Qazirgi ýaqytta tergeý jalǵasyp jatyr. Qylmystyq-protsestik kodekstiń 201-babyna sáikes, ózge málimetter jariia etilmeidi.
