Qyzylorda oblysynda apatqa ushyraǵan Mi-8 tikushaǵynyń ekipajy áýe kemesin sharýa qojalyǵynyń ústinen árirek alyp ketken, dep habarlaidy QazAqparat tilshisi.
«Men apat oryn bolǵan jerge birinshi jettim. Alǵashqyda kórgenim tikushaq bólikteriniń jan-jaqqa shashyrap ketkeni boldy. Kýáger aýyl turǵynynyń aitýynsha, «tikushaq týra ústinen ushyp ótip baryp, qulaǵan». Bul ekipajdyń sońyna deiin kúreskenin dáleldeidi. Sharýa qojalyǵy zardap shekpes úshin tikushaqty basqa jaqqa buryp áketken. Men 13 jigit te - batyr dep esepteimin», - dedi QR Qarýly kúshteri áskeri-áýe kúshteriniń qolbasshysy Dáýren Qosanov OKQ-da ótken baspasóz máslihatynda.
Eske sala ketsek, QR IIM TJK baspasóz qyzmeti buǵan deiin Qyzylorda oblysynyń Jalaǵash aýdanynda MI-8 tikushaǵy apatqa ushyraǵanyn habarlaǵan bolatyn.
Qorǵanys ministrliginiń aqparatyna sáikes, atalǵan tikushaq 4 birdei áskeri tikushaq quramynan turatyn bólimmen birge Aqtaý qalasynan Shymkentke ushyp bara jatqan. Ushý sapary arnaiy bólimshelerdiń «Altyn jebe» keshendi oqý jáne jattyǵý aiasynda qarańǵyda ári kúrdeli meteorologiialyq jaǵdaida júrgizilgen.
Tikushaqta bolǵan 13 adam qaza tapty.
