TJ rejimine bailanysty shyǵynǵa ushyraǵan meiramhana biznesine memleketten nesie bólinip, qoldaý kórsetile me? Bul suraqqa «Atameken» UKP basqarma tóraǵasy Abylai Myrzahmetov jaýap berdi, dep habarlaidy QazAqparat
«Álbette, elde tótenshe jaǵdaidyń engizilýine bailanysty shyǵynǵa ushyraǵan salalardyń alǵashqy leginde meiramhanalar biznesi de tur. Olar úshin óz jumysyn qaita qalpyna keltirý de qiyndyq týǵyzary sózsiz. Sebebi ol – adamdar jinalatyn oryn. Al qazir bári de sanitarlyq talaptardy saqtaýǵa mindetti. Iaǵni meiramhanaǵa baryp otyrýdyń ózinen adamdarda psihologiialyq úrei qalyptasyp qaldy. Sol sebepti meniń oiymsha adamdar burynǵysha meiramhanaǵa jappai jinalmaityn sekildi. Bárine daiyn bolý kerek. Dál osy kezde onlain amal-ádisterdi meńgergen durys», - dedi Abylai Myrzahmetov Ulttyq kásipkerler palatasynyń Facebook paraqshasynda onlain rejimde sóilegen sózinde.
Palata basshysy sonymen qatar biznestiń osy salasyndaǵy ókilderine arnaiy nesie berý týraly usynysqa qatysty oiyn bildirdi.
«Meiramhanalar úshin arnaiy nesie jelisi joq. Alaida «Biznestiń jol kartasy» baǵdarlamasymen shekteýlerdiń báriniń alynyp tastalǵanyn eskerý kerek. Iaǵni ol jerden 6 paiyzben nesie ala alasyz. Meiramhanalarǵa da memlekettiń dál osy qoldaýyn alýǵa múmkindik bar. Biraq olar «Qarapaiym zattar ekonomikasy» baǵdarlamasyna qatysa almaidy. Ol basqa salalardy kózdeidi», - dedi ol.
Eske sala ketsek, QR Prezidenti Qasym-Jomart Toqaev tótenshe jaǵdai rejimin biylǵy 11 mamyrǵa deiin uzartý jóninde sheshim qabyldady. Bul týraly Memleket basshysy búgingi málimdemesinde aitqan bolatyn.
