Ánshi, aktrisa Merýert Túsipbaeva ózine qoqan-loqqy jasap, jelide tildep, aryn qorlaǵandardy sotqa bermek, dep habarlaidy "Ult aqparat" sputniknews.kz portalyna silteme jasap.
"Biz demokratiialyq qoǵamda turyp jatyrmyz. Men Qazaqstannyń eńbek sińirgen qairatkeri retinde milliondar qatarynda óz pikirimdi aittym. Buǵan meniń quqyǵym bar!! Oǵan jaýap retinde apaly-sińliler maǵan til tigizip, arymdy qorlap, jala japty!! Keshegi kúnnen bastap maǵan qoqan-loqqy jasap jatyr. Men kóp ýaqyt shydadym. Endi tiisti quqyq qorǵaý organdaryna júginýge májbúrmin. Eskertemin! Barlyq qońyraýlar, kommentariiler jazylady. Sotta kezdesemiz!", — dep jazdy Túsipbaeva áleýmettik jelidegi paraqshasynda.
Artynsha ol paraqshasyna ózin tildegenderdiń jazǵanyn salyp, tipti bireýinen jaýap alynyp jatqanyn jetkizdi.
"Bizdiń elimizde tipti serial týraly pikir aitý qaýipti", — dep jazǵan ánshi.
Aita keteiik, Merýert Túsipbaeva Baian Alagózovanyń daýly "Qozy Kórpesh — Baian Sulý" telehikaiasyn synap, ony túsirýge jumsalǵan memleket qarajatyn qaitarýdy talap etken bolatyn. Buǵan prodiýser "Hit ánder oryndap, keremet rólderdi somdai almaǵanyń úshin keshirersiń. Sol sebepti prodiýser retinde seniń kásibi biliktiligińe kúmán keltiremin, oǵan tolyqtai haqym bar. Ókpe-renishińniń de orny bar, ról bersek, basqasha sairaityn ediń", — dep jaýap berdi.
