Qasym-Jomart Toqaev Qyrǵyzstan Prezidenti Sadyr Japarovpen shaǵyn quramda kelissózder ótkizdi, dep habarlaidy "Ult aqparat" Aqordaǵa silteme jasap.
Aqorda rezidentsiiasynda Qyrǵyz Prezidenti Sadyr Japarovty saltanatty qarsy alý rásimi ótti. Eki eldiń memlekettik ánurandary oryndalǵannan keiin Qurmet qaraýyly rotasynyń bastyǵy Qazaqstan men Qyrǵyzstan prezidentterine raport berdi. Memleket basshylary Qurmet qaraýylynyń aldynan ótip, shaǵyn quramda kelissózder júrgizý úshin rezidentsiianyń «Shyǵys zalyna» bardy.
Qasym-Jomart Toqaev Sadyr Japarovtyń prezident retinde alǵashqy memlekettik saparyn Qazaqstannan bastaǵanynyń mańyzy zor ekenin atap ótti.
– Bul - Qazaqstanǵa degen úlken qurmet. Saparyńyzdyń róli, maǵynasy aiyryqsha dep aitýǵa bolady. Sebebi bul sapar eki el arasyndaǵy qarym-qatynastarǵa úlken serpin beredi. Shyn máninde saparyńyzdyń baǵdarlamasy aýqymdy. Sondyqtan biz búgin eń ózekti máseleler boiynsha pikir almasamyz. Qudai qalasa, eki halyqtyń múddesine sai tiisti kelisimderge qol jetkizemiz dep oilamyn, – dedi Memleket basshysy.
Qasym-Jomart Toqaev qazaq-qyrǵyz bailanystary arasynda dástúrli dostyqtyń bar ekenine, sondai-aq, Qyrǵyzstan – elimiz úshin tek odaqtas memleket qana emes, baýyrlas memleket ekenin jetkizdi.
– Bul dástúrdi joǵary baǵalaimyz. Aldymyzda turǵan mindetimiz osy dástúrdi jalǵastyrý, nyǵaitý. Sondyqtan búgingi kelissózderdiń mańyzy zor, – dedi Memleket basshysy.
Óz kezeginde, Qyrǵyzstan Prezidenti Qasym-Jomart Toqaevqa Qazaqstanǵa memlekettik saparmen shaqyrǵanyna rizashylyǵyn bildirdi. Sadyr Japarov eki el arasyndaǵy qarym-qatynastardyń tereń ekenin sipattai otyryp, qazaqtyń belgili aqyny Juban Moldaǵalievtiń sózderin eske aldy.
– Men qazaqpyn, qyrǵyz ol – týysqanym, Birge tartqan tarlannyń quiysqanyn. Anamyz da qara kóz bir qyz, bálki, Bólip bergen egizge ýys nanyn, – dep qazaq aqynynyń poemasynan úzindi keltirdi, Qyrǵyz Prezidenti.
Sadyr Japarov Qazaqstan men Qyrǵyzstan arasynda yntymaq pen baýyrlastyq ornap, eshqashan sheshilmeitin máseleler bolmaýy kerek ekenin aitty.
Sadyr Japarov Qasym-Jomart Toqaevty ózine yńǵaily ýaqytta Qyrǵyzstanǵa saparmen kelýge shaqyrdy.
Kezdesý barysynda Qazaqstan men Qyrǵyzstan prezidentteri ekijaqty strategiialyq seriktestiktiń aýqymdy máseleleri, atap aitqanda, saiasi, saýda-ekonomikalyq, investitsiialyq, kólik-logistikalyq, sý-energetikalyq, koronavirýs indetine qarsy birlesken sharalar, mádeni-gýmanitarlyq baǵyttar, sondai-aq, Eýraziialyq integratsiia jáne kópjaqty qurylymdar aiasyndaǵy bailanystardy talqylady.
