QR Mádeniet jáne sport ministri Aqtoty Raiymqulova QR Memlekettik týyn paidalaný týraly zańnamaǵa qandai ózgerister engenin túsindirdi, dep habarlaidy "Ult aqparat".
«Ózderińiz bilesizder, 2020 jylǵy 27 qazanda Memleket basshysy Q.K. Toqaevtyń Memlekettik týdy paidalanýǵa qatysty memlekettik rámizderdi paidalaný qaǵidalaryn qaita qaraý tapsyrmasy berildi. Atalǵan tapsyrmany oryndaý aiasynda QR Úkimetiniń 2020 jylǵy 27 qarashadaǵy №801 qaýlysymen QR Memlekettik týyn, eltańbasyn jáne olardyń beinelerin, QR Memlekettik gimniniń mátinin paidalaný qaǵidalaryna ózgerister engizildi. Endigi kezekte bul ózgerister arqyly azamattarymyz úshin Memlekettik týdy paidalaný aiasy zańnamalyq turǵyda keńeitilip otyr», - dep atap ótti ministr Ortalyq kommýnikatsiialar qyzmetinde ótken brifingte.
Eń aldymen QR Memlekettik týyn jeke jáne zańdy tulǵalar ǵimarattarda, onyń ishinde balkondarda jáne saltanatty is-sharalar ótkiziletin oryndarda patriottyq sezimderin, qazaqstandyq biregeiligin bildirý úshin, el azamattarynyń jetistikterin qoldaý maqsatynda paidalana alady.
«Sonymen qatar jeke tulǵalarǵa osy qaǵidalarǵa engizilgen ózgeristerge sáikes, QR Memlekettik týyn bir qabatty nemese kóp qabatty ǵimarattarda ekstererli nusqada ornalastyrý kezinde ǵimarattyń sáýlet erekshelikterine qaramastan paidalaný múmkindigi berildi. Budan bylai jeke tulǵalar ǵimarattarda ornalastyrylatyn Memlekettik týdy qarańǵy ýaqytta jaryq quraldaryn qoldanbai-aq paidalana alady.
Jalpy alǵanda, joǵaryda kórsetilgen ózgertýler Memlekettik týdyń qoldanylý aiasyn edáýir keńeitedi, onyń qoǵamdaǵy patriotizm rýhyn nyǵaitýǵa baǵyttalǵan simvoldyq kapitalyn jańasha uǵynýǵa múmkindik beredi», - dedi Aqtoty Raiymqulova.
Sonymen birge Nur-Sultan, Almaty, Shymkent qalalarynyń jáne oblys ákimdikteri jyl saiyn qazaqstandyqtar arasynda memlekettik rámizderdi dáripteý jáne patriotizmge tárbieleý maqsatynda «Meniń týym, meniń Otanym!» aktsiiasyn ótkizedi.
