Memlekettik satyp alýda negizsiz qymbat baǵalarǵa tekserý júrgizilip, 5 mlrd teńge únemdeldi. Bul týraly QR Sybailas jemqorlyqqa qarsy is-qimyl agenttigi tóraǵasynyń orynbasary Ulan Sarqulov aitty, dep habarlaidy QazAqparat.
«Sybailas jemqorlyqtyń taǵy bir mańyzdy faktory – memlekettik satyp alýdy josparlaý kezinde baǵanyń negizsiz qymbat bolýy. Bul aqsha aldyn ala para úshin de, jaqsy paida tabý úshin de eseptelip jazylady. Agenttik «Atameken» ulttyq palatasymen birlesip júieli negizde qymbat baǵalarǵa monitoring júrgizip jatyr. Jyl basynan beri bizdiń usynystarymyzben memlekettik organdar óz satyp alýlaryn qaita qarap, biýdjetten 5 mlrd teńgege jýyq qarjy únemdedi», - dedi U. Sarqulov Ortalyq kommýnikatsiialar qyzmetinde ótken baspasóz máslihatynda.
Spikerdiń aitýynsha, 2 jyl ishinde shamamen 74 mlrd teńge únemdelgen.
«Osyndai baǵany kóterý kezinde laýazymdy tulǵalarǵa esh jaýapkershilik artylmaityny anyqtaldy. Biz Qarjy ministrligine uqypsyz sheneýnikterdi ákimshilik tártipte jazalaýdy usynyp, usynystar engizdik», - dedi Ulan Sarqulov.
Sonymen birge, sybailas jemqorlyqtyń taǵy bir sebebi – keibir satyp alý rásimderiniń jabyq bolýy.
«Tapsyrys berýshi «aqparatty shektep taratý» belgisimen satyp alýdy jabady jáne is júzinde ony sybailas jemqorlyq aýmaǵyna engizedi. Mundai satyp alý tek qaǵaz júzinde ǵana iske asady jáne qoǵamdyq baqylaýdan tys qalady. Nátijesinde bul satyp alýǵa úlestes kompaniialar qatysady, baǵalar negizsiz kóteriledi jáne qajetsiz jumystar men qyzmetter satyp alynady. Mysaly, keibir aimaqtarda qaiyrymdylyqqa baǵyttalýy kerek áleýmettik mańyzdy sharalar túrinde kontsertter, keremet shoýlar jáne jeke avtorlyq keshter satyp alynǵan. Bir ǵana óńirde bul maqsattarǵa 1,7 mlrd teńge jumsalǵan. Qazir memlekettik satyp alý júiesin osy baǵytta qaita formattaý qajet bolyp otyr», - dep túsindirdi agenttik ókili.
