Qazaqstan bas prokýrory Jaqyp Asanov búgin Astanada 2016 jyldyń qorytyndysy jáne aldaǵy kezeńge arnalǵan mindetteri jaily ótken bas prokýratýranyń alqa jiynynda prokýrorlardyń jumysyn synady, - dep habarlaidy "Ult aqparat".
Asanov prokýratýra quramynda "adal qyzmetkerlerdiń" kóp ekenin, al "masyldardyń" odan da kóbin aitty. Bas prokýror jiynda "vedomstvo qyzmetkerleri tańnan keshke deiin memleketke paidaly jumyspen ainalysyp jatqandai eles týdyrmaýǵa" shaqyrdy. Prokýratýrada "zamanaýi oilaityn" qyzmetkerlerdiń baryn aitqan Asanov áriptesterin jumys isteý tásilin, mentalitet pen oilaýdy túbegeili ózgertýge shaqyrdy.
Qazaqstan prezidentiniń kómekshisi - Qaýipsizdik keńesiniń hatshysy Vladimir Jumaqanov ótken jyly prokýratýra keńseleri aldynda ózin-ózi órteý oqiǵalary bolǵanyn aityp, prokýrorlardy zańnyń saqtalýyn durys qadaǵalaýǵa shaqyrdy.
Jeltoqsannyń 6-sy kúni Jambyl oblysy Shý qalasynyń 48 jastaǵy turǵyny Maira Rysmanova ulynyń sottalýyna qarsylyq bildirip, Astanadaǵy bas prokýratýranyń kire berisindegi jerde ózin órtegen. Denesi qatty kúigen áiel birneshe kúnnen soń aýrýhanada kóz jumǵan. Bas prokýratýra Rysmanovanyń týystaryna tekserý júrgizýge ýáde bergen.
22 jeltoqsanda Shymkentte oblystyq prokýratýra aldynda jergilikti kásipker Nurken Ainabekov ústine benzin quiyp, ózin-ózi órtegen. Óz-ózin órteý kezinde onyń ústinen alaiaqtyq baby boiynsha qylmystyq is qozǵalǵan.
