Májilistiń jalpy otyrysynda Úkimet basshysynyń birinshi orynbasary Álihan Smaiylov memlekettik qaryz qaýipsiz deńgeide ekenin aitty, dep habarlaidy "Ult aqparat".
Qarjy ministri Erulan Jamaýbaev memlekettik qaryz turǵysyndaǵy jaǵdai kún saiyn baqylaýda ekenin jetkizdi.
«Memlekettik qaryz aitarlyqtai qaýipsiz deńgeide ekenine sendirgim keledi. Bul baǵytta kún saiyn monitoring júrgiziledi. Aldaǵy jyldary biýdjet tapshylyǵy kólemi tómendeitin bolady. Reiting boiynsha bizdiń qaryzdy basqa eldermen de salystyryp otyramyz. Mysaly, Túrkiiada memlekettik qaryz kórsetkishi jalpy ishki ónimge shaqqanda 40 paiyz, Meksikada – 55 paiyz, Indoneziiada – 37 paiyz», - dedi ministr.
Óz kezeginde Úkimet basshysynyń birinshi orynbasary Álihan Smaiylov memlekettik qaryz qaýipsiz deńgeide ekenin rastady.
«27 paiyz deńgeiindegi limit – ol tujyrymdama aiasynda bekitken ishki limitimiz. Halyqaralyq uiymdar jalpy ishki ónimnen 50 paiyzdyq limitti belgileidi. Qazirgi kezde kóptegen elderdegi daǵdarystyq qubylystarǵa bailanysty osy limitti EO elderinde arttyrý jaǵyn pysyqtap jatyr. Jalpy, bul kórsetkishti turaqty monitoringpen qamtyp otyrmyz. Atap aitqanda, úsh jyldyq biýdjet aiasynda tapshylyqty birtindep tómendetemiz», - dedi Á. Smaiylov.
