Sýret: Aqorda
Prezident Qasym-Jomart Toqaevtyń BAQ salasy qyzmetkerlerin marapattaý rásimine qatysty. Bul týraly Aqordanyń baspasóz qyzmeti málim etti.
"Eń aldymen, barshańyzdy Buqaralyq aqparat quraldarynyń qyzmetkerleri kúnimen shyn júrekten quttyqtaimyn! Túptep kelgende, memleket te, jýrnalist te ult úshin qyzmet etedi, el taǵdyryn sheshýge atsalysady. Óitkeni, ult baspasózi men ult múddesi qai kezde de ózektes bolǵan. Qazir de solai", - dedi prezident.
Jalpy, depýtat pen jýrnalist qyzmeti biri-birimen tyǵyz bailanysyp jatyr, dep atap ótti ol.
"Ekeýi de el múddesin qorǵaidy. Halyq senimin arqalap, oǵan múltiksiz qyzmet etedi. Qazir depýtattar korpýsy men mass-media ókilderi úilesimdi jumys isteýde. Qazirgi depýtattar quramynda aqparat salasynyń ókilderi jetkilikti. Atap aitqanda, Nurtóre Júsip, Ermurat Bapi, Qazybek Isa, Sergei Ponomarev, Janarbek Áshimjan, Bibigúl Jeksenbai, Aigúl Qapbarova sekildi áriptesterińiz kópshilikke belgili. Prezident Ákimshiliginde de áriptesterińiz az emes. Olar óz kásibi ortasyna qoldaý bildirip, buqaralyq aqparat quraldary men memlekettik organdar arasynda altyn kópir qyzmetin atqarady", - dedi Qasym-Jomart Toqaev.
Sondai-aq prezident «Egemen Qazaqstan», «Kazahstanskaia pravda», «Aiqyn», «Liter», «Turkistan», «Ana tili», «Qazaq ádebieti» basylymdaryn, aimaqtarda shyǵatyn gazetterdi de úzbei oqitynyn aitty.
Prezident Qazaqstanda áldeqashan jańa saiasi jaǵdai qalyptasqanyn atap ótti. Ony sóz bostandyǵynan, ashyq básekelestikten, bilik pen qoǵam arasyndaǵy konstrýktivti dialogtan, búkil aqparattyq resýrstardyń qol jetimdiliginen baiqaýǵa bolady, deidi ol.
"Qazaqstanda júzdegen táýelsiz BAQ pen mediaresýrs bary. Al internettegi kóptegen túrli blogtar men kanaldar týraly aitpasa da bolady. Olar elde bolyp jatqan úderisterdi ár qyrynan jariialap kórsetedi, bilik organdarynyń qyzmetine syn aitady. Biraq biz áýel bastan pikir alýandyǵyna umtylyp kelemiz. Bul – bizdiń aitýly jetistigimiz.
Biz osyndai ózgerister júzege asyryldy dep senimmen aita alamyz. Mundai jaǵdaida BAQ-tyń róli men jaýapkershiligi arta túsedi. Otandyq mass-media árdaiym obektivtilikti, beitaraptylyqty saqtap, el men qoǵamnyń múddesin bárinen joǵary qoiatynyna senimdimin", - dedi memleket basshysy.
