Kezdesý barysynda memleketter basshylary ekijaqty kún tártibindegi aýqymdy máselelerdi talqylady, dep habarlaidy ult.kz.
Qasym-Jomart Toqaev Vladimir Pýtinge Omby tórinde qonaqjailyq tanytqany úshin alǵys aitty. Sonymen qatar HHII óńiraralyq yntymaqtastyq forýmy aiasyndaǵy búgingi júzdesý Qazaqstan-Resei yqpaldastyǵynyń negizgi baǵyttaryndaǵy jan-jaqty dialogty jalǵastyryp, aldaǵy qadamdardy naqtylaýǵa múmkindik beretinin jetkizdi.
– Biz – asa iri saýda seriktesterimiz. Byltyr saýda kólemi shamamen 28 milliard dollardy qurady. Biylǵy betalysymyz da óte jaqsy. Ótken jylǵy sáikes kezeńmen salystyrǵanda, biyl bes aida ózara saýda kóleminiń qarqyny aitarlyqtai arta tústi. Resei ekonomikamyzǵa investitsiia salatyn elderdiń arasynda kósh bastap tur. Investitsiia kólemi shamamen 30 milliard dollarǵa jetti. Birlesken kúsh-jigerdiń arqasynda jalpy quny 53 milliard dollar bolatyn 177 perspektivti ónerkásip jobasynyń tizimi jasaqtaldy. Onyń 122-si iske asyryldy. Qazirgi kúrdeli geosaiasi jaǵdaidy eskersek, bul – kóńil qýantatyn jetistik, – dedi Qazaqstan Prezidenti.
Memleket basshysy gýmanitarlyq saladaǵy yqpaldastyq deńgeiin joǵary baǵalady. Sondai-aq Qazaq ulttyq ýniversitetiniń Ombydaǵy filialyn ashýǵa qoldaý bildirgeni úshin Resei memleketiniń basshysyna rizashylyǵyn bildirdi.
Qasym-Jomart Toqaev Qazaqstandaǵy alǵashqy atom elektr stantsiiasyn birlese salý jobasynyń aǵymdaǵy jaǵdaiy týraly pikir bildirdi.
– Maǵan Balqash kóli mańynda nysan ornyn daiyndaý jumystary aiaqtalýǵa jaqyndaǵanyn baiandady. Bul joba Qazaqstan aýmaǵynda energiianyń jańa túrin óndirýge ǵana qatysty emes. Ol sonymen qatar memleketterimizdiń, eń bastysy, halyqtarymyzdyń jáne óskeleń urpaqtyń arasynda altyn kópir bolady. Óitkeni biz Resei kómegimen tehnikalyq kadrlardy, keiin atom indýstriiasy siiaqty asa kúrdeli salada jumys isteitin jergilikti qazaq mamandaryn daiarlaǵymyz keledi, – Qasym-Jomart Toqaev.
Memleket basshysynyń paiymdaýynsha, forým taqyryby qazirgi halyqaralyq jaǵdai turǵysynan erekshe ózekti.
Onyń pikirinshe, álemdegi eń uzyn ári tutas qurlyq shekarasymen túiisken Qazaqstan men Reseige Eýraziiadaǵy kólik-logistika júiesiniń damýynda jetekshi ról atqarýdy taǵdyrdyń ózi buiyrtyp otyr.
– Bul – qazirgi óte kúrdeli geosaiasi jaǵdaida elderimizdiń jahandyq básekedegi artyqshylyǵyn aiqyndaityn basty faktor. Biz kúsh-jiger jumyldyrýdyń arqasynda bul saladaǵy barlyq mindetti tabysty eńserip, infraqurylymdy júieli damytyp kelemiz ári tranzittik áleýetimizdi nyǵaita tústik. Ótken jyly elderimiz arasyndaǵy temirjol kóligimen júk tasymaldaý 3,5 paiyzǵa artyp, 92 million tonnany qurady. Sonymen qatar Qazaqstan aýmaǵy arqyly tranzit tasymaly jandana tústi. Tek sońǵy bes jylda Qytai – Resei – Qytai baǵyty boiynsha Qazaqstan territoriiasynan ótken konteinerlik tasymaldyń kólemi segiz ese artty. Resei – Qazaqstan – Qytai baǵytyndaǵy millionynshy konteiner eleýli meje boldy. Álbette, munymen shektelip qalmaimyz. Avtomobil kóligimen tasymaldaý da eselene tústi. Byltyr onyń kólemi 8,5 million tonnadai bolǵan. Biylǵy birinshi toqsannyń qorytyndysy boiynsha ótken jylǵy kezeńmen salystyrǵanda 4,3 million tonnaǵa jetip, eki eseden asa ulǵaidy. Bul saladaǵy birlesken júieli jumysty jalǵastyrcaq, osy qarqyndy saqtap qalýǵa ábden bolady. Men buǵan senimdimin, – dedi Qasym-Jomart Toqaev.
Prezident Soltústik – Ońtústik dálizin damytýǵa airyqsha mán berilip otyrǵanyna nazar aýdardy. Byltyr bul taraptaǵy júk tasymaly edáýir ósken.
Taǵy bir mańyzdy baǵyt – Batys Eýropa – Batys Qytai dálizi. Qasym-Jomart Toqaevtyń aitýynsha, Aqtóbe – Ulǵaisyn jolyndaǵy rekonstrýktsiia dálizdiń ótkizý múmkindigin eki ese arttyrýǵa múmkindik beredi.
– Qoldanystaǵy tsifrlyq platformalar bazasynda «Qazaqstan – Resei» tsifrlyq kólik dálizin pilottyq rejimde iske qosýdy usynamyn. Sebebi bul – kólik nópiri kóp baǵyttardyń biri. Eki eldiń kólik-logistika júiesin tsifrlyq turǵyda tiimdi integratsiialaý jáne jańa tehnologiialardy keńinen qoldaný bizge ózara saýda-sattyq kólemin ulǵaityp, kólik aǵynyn arttyrýǵa jáne jan-jaqty ekonomikalyq bailanystardy nyǵaitýǵa múmkindik beredi. Biyl mamyr aiynda Vladimir Vladimirovich Pýtinniń Qazaqstanǵa jasaǵan memlekettik sapary aiasynda júrgizýshisiz júk kólikteri alǵash ret eki el eki ortasynda qatynady. Muny aitýly ýaqiǵa deýge bolady. Osynaý sátti tájiribe Qazaqstan men Reseidiń kólik salasyndaǵy seriktestigi jańa tehnologiialyq deńgeige shyqqanyn kórsetti, – dedi Memleket basshysy.
