Qazaqstan Respýblikasynyń Prezidenti Qasym-Jomart Toqaev Amerika Qurama Shtattarynyń Prezidenti Donald Tramppen telefon arqyly sóilesti, dep habarlaidy ult.kz.
Memleket basshysy Amerika kóshbasshysyn AQSh táýelsizdiginiń 250 jyldyǵymen quttyqtap, tarih úshin qas-qaǵym sát sanalatyn úsh urpaqtyń ǵumyryna barabar kezeńde bul eldiń qýatty jahandyq derjavaǵa ainalǵanyna nazar aýdardy.
Prezident AQSh ákimshiliginiń aqyl-parasatqa arqa súiegen ishki saiasi baǵdary elimizde iske asyrylyp jatqan «Zań men tártip» qaǵidaty negizinde Ádiletti Qazaqstan qurý strategiiasymen úndesetinin, sondyqtan Donald Tramp júrgizip otyrǵan saiasatty qoldaitynyn aitty.
Áńgimelesý barysynda taraptar ekijaqty ekonomikalyq yntymaqtastyq jáne saiasi yqpaldastyq máseleleri jóninde pikir almasty.
Qasym-Jomart Toqaev byltyr qarasha aiynda Vashingtonǵa jasaǵan sapary barysynda qol jetkizilgen mańyzdy kelisimder joǵary qarqynmen júzege asyrylyp jatqanyn atap ótti.
Memleket basshysy Qazaqstannyń iadrolyq qarýdy jáne baiytylǵan ýrandy taratpaýǵa qatysty ustanymynan ainymaitynyn rastady. Sondai-aq halyqaralyq baqylaý rejimin nyǵaitý maqsatynda MAGATE-men aradaǵy yntymaqtastyqtyń mańyzyna toqtaldy.
Budan bólek, jaqynda Aqordada senator Stiv Deinspen, AQSh Prezidentiniń arnaýly ókili Serdjio Gormen jáne Aq úidiń basqa da joǵary laýazymdy tulǵalarymen, amerikalyq iskerlik top ókilderimen bolǵan kezdesýler men kelissózderge oń baǵa berildi.
Qasym-Jomart Toqaev Donald Trampty ózine qolaily ýaqytta Qazaqstanǵa saparmen kelýge shaqyrdy.
