Qazaqstan Prezidenti Qasym-Jomart Toqaev pen Belgiia Premer-ministri Bart de Vever eki el yntymaqtastyǵynyń qazirgi jai-kúii men perspektivasyn talqylap, saiasi dialogty nyǵaitý, saýda-ekonomikalyq jáne investitsiialyq bailanystardy damytýǵa airyqsha nazar aýdardy, dep habarlaidy ult.kz.
Memleket basshysy Belgiiany Qazaqstannyń Eýropalyq Odaqtaǵy basty seriktesteriniń biri retinde atady.
Qasym-Jomart Toqaevtyń aitýynsha, ekonomikalyq yqpaldastyqtyń qarqyny budan da zor áleýetke ie. Belgiia Qazaqstan ekonomikasyna qarjy quiǵan 10 jetekshi investordyń qataryna kiredi. Sońǵy 20 jylda atalǵan elden kelgen tikelei investitsiianyń jalpy kólemi 15 milliard dollardy qurady.
Ózara saýda ainalymy da turaqty túrde ósip keledi. Onyń kólemi byltyr 580 million dollardan asty.
– Qazaqstanda Belgiia kapitalynyń úlesi bar 110-nan astam kompaniia jumys isteidi. Bul ózara tiimdi yntymaqtastyqty nyǵaitýǵa degen ortaq umtylysymyzdy ańǵartady. Tanymal belgiialyq kompaniialar bizdiń eldiń naryǵyna kóptep kelip jatyr, – dedi Qasym-Jomart Toqaev.
Premer-ministr Bart de Vever eki el arasynda saiasi dialog deńgeii joǵary ekenin atap ótti. Ol Belgiianyń ekijaqty qarym-qatynasty odan ári tereńdetýge jáne strategiialyq seriktestik aiasyn keńeitýge nietti ekenin málimdedi.
Taraptar kólik-logistika, asa mańyzdy mineraldar, munai himiiasy, aýyl sharýashylyǵy, ónerkásip, tsifrlyq transformatsiia, jasandy intellekt jáne qarjy salalaryndaǵy birlesken investitsiialyq jobalardy iske asyrý múmkindikterin qarastyrdy.
Budan bólek, ǵylym jáne bilim berý salasyndaǵy yqpaldastyq, ásirese, ýniversitetter, zertteý ortalyqtary men tehnologiialyq kompaniialar arasyndaǵy seriktestikti ilgeriletý perspektivasy pysyqtaldy.
Memleket basshysy oraily sátti paidalana otyryp, Belgiia Koroli Filippke jáne Koroleva Matildaǵa izgi sálemin joldady.
Prezident ekijaqty qatynastar tarihynda alǵash ret Korol Filipptiń biyl Qazaqstanǵa jasaityn memlekettik saparyna airyqsha mán beretinin atap ótti.
Qasym-Jomart Toqaev Bart de Veverdi ózine qolaily ýaqytta Qazaqstanǵa resmi saparmen kelýge shaqyrdy. Premer-ministr shaqyrýdy yqylaspen qabyl aldy.
Sondai-aq taraptar óńirlik jáne halyqaralyq kún tártibiniń ózekti máseleleri jóninde pikir almasty.
