Memleket basshysy Qasym-Jomart Toqaev Alataý qalasyn damytý jónindegi keńeste sóilegen sózinde qoǵamdyq tártip pen zańǵa qurmet máselesine erekshe toqtaldy, dep habarlaidy ult.kz.
Prezidenttiń aitýynsha, eldi mekenderdi abattandyrý, aýmaqtardy kógaldandyrý jáne ekologiialyq mádenietti qalyptastyrý jumystary turaqty nazarda bolýy tiis. Sondai-aq týristik nysandar men tabiǵi aýmaqtardaǵy tártipke de qatań baqylaý qajet ekenin aitty.
– Tártip buzýshylardy, iaǵni vandaldardy zańǵa sáikes jaýapqa tartý qajet. Bir sózben, quqyqtyq nigilizmge qoǵam bolyp qarsy turýymyz kerek, – dedi Memleket basshysy.
Qasym-Jomart Toqaev zańǵa baǵyný jazadan qorqýmen emes, azamattyq jaýapkershilikpen bailanysty ekenin atap ótti.
– Zań men tártipke qurmetpen qaraý degenimiz – jazadan qorqý emes, bul – eń aldymen jaýapkershilik sezimi joǵary azamattarǵa tán airyqsha bolmys, – dedi Prezident.
Memleket basshysy qazirgi kúrdeli geosaiasi jaǵdaida Qazaqstan úshin tatýlyq pen turaqtylyqtyń mańyzy zor ekenin aitty. Onyń sózinshe, zań ústemdigi saqtalmaiynsha, eshqandai reforma men oń ózgeris júzege aspaidy.
Sonymen qatar Prezident quqyq qorǵaý organdary zań buzýshylyqtarǵa qatysty qatań sharalar qoldanýy qajet ekenin jetkizdi.
– Keibir elimizdi jaqtyrmaityn, mensinbeitin kisiler, ókinishke qarai, solardyń ishinde Parlament depýtattary bar, quqyqtyq áreketterimizdi “Shtrafstan”, “Aiyppulstan” dep ataidy eken. Meili, óz oilarynyń kelteligin kórsete bersin, – dedi ol.
Prezidenttiń aitýynsha, qoǵamnyń basty talaby – qaýipsizdik pen qoǵamdyq tártip.
– Biz osy joldan taimaimyz, batyl túrde “Zań men tártip” saiasatyn júrgizemiz. Sebebi bul – halqymyzdyń talaby, halqymyzdyń suranysy, – dep túiindedi Qasym-Jomart Toqaev.
