Qazaqstandyq ekonomikanyń bolashaqtaǵy qurylymynna jańasha kózqaraspen qaraýǵa týra keledi.
Bul týraly Tótenshe jaǵdai rejimin qamtamasyz etý jónindegi memlekettik komissiianyń qorytyndy otyrysynda Memleket basshysy Qasym-Jomart Toqaev aitty, dep habarlaidy QazAqparat.
«Birinshi - qazaqstandyq ekonomikanyń óz-ózine jetkiliktiligin arttyrý. Bul úshin qolda bar shikizattyń bazalyq qýatynyń negizinde ónerkásipte jańa qaita óńdeýdi damytý qajet. Bizge qazaqstandyq ekonomikanyń bolashaqtaǵy qurylymynna jańasha kózqaraspen qaraýǵa týra keledi. Onyń árbir basty «sektorynyń rólin aiqyndaý qajet: Ónerkásiptik, energetikalyq, aýyl sharýashylyǵy, servistik. Basqasha aitar bolsaq, shuǵyl arada ekonomikanyń jańa qurylymyn qalyptastyrý kerek», - dedi Qasym-Jomart Toqaev.
QR Prezidentiniń atap ótýinshe, energetikalyq sektor aitarlyqtai reformany talap etedi. Daǵdarystan keiin ol burynǵydai bolmaq emes. Ortasha merzimdi kezeńde «jasyl energetika» baǵytyna qarai ilgerileý - asa qajettilik.
«Indýstriialandyrýǵa qatysty da bizdiń ádisterimizdi qaita qarap shyǵý qajet bolady. Eksporttyq jáne ishki naryqtyń shynaiy múmkindikterin aiqyndap, qol jetkiziletin maqsattar men quraldardy belgilep, ilgeri júrý kerek», - dedi Prezident.
Memleket basshysynyń atap ótýinshe, memlekettik satyp alýlar men kvazimemlekettik sektordaǵy satyp alýlardy saýatty paidalanýdy ekonomikalyq belsendilikti qalpyna keltirýdiń quraly retinde qarastyrý qajet. Bul rette otandyq taýar óndirýshilerdi qoldaýǵa baǵyttalǵan memlekettik satyp alýlardyń airyqsha tártibi osy jyldyń tamyzyna deiin qoldanysta bolady. Otandyq materialdar men qural-jabdyqtardy barynsha paidalaný biznesti damytýdyń basymdyqty sharty retinde belgilenedi.
«Infraqurylymdyq baǵdarlamalar boiynsha qazirgi ornalasý deńgeiin 40-tan 60-70 paiyzǵa deiin arttyrý kerek. Úkimettiń, ákimderdiń, kvazimemlekettik kompaniia basshylarynyń jumysyn baǵalaý negizinen osy kórsetkishterge bailanysty bolady», dedi Qasym-Jomart Toqaev.
