Qazaqstan qoǵamdyq tártip pen qaýipsizdik deńgeii boiynsha 143 el men aýmaqtyń arasynda 41-orynǵa turaqtady. Mundai málimetter World Justice Project (WJP) halyqaralyq uiymynyń 2026 jylǵy zertteýinde jariialandy.
Sońǵy tórt jylda Qazaqstan osy kórsetkish boiynsha óz pozitsiiasyn turaqty túrde jaqsartyp keledi. 2023 jyly el 44-orynda bolsa, 2024 jyly 43-orynǵa, 2025 jyly 42-orynǵa kóterildi. Al biyl 41-satyǵa jaiǵasty.
Sarapshylar neni baǵalady?
Qoǵamdyq tártip pen qaýipsizdik kórsetkishi halyqtyń qylmystylyqtan, terrorizm qaýpinen, qarýly qaqtyǵystardan jáne saiasi zorlyq-zombylyqtan qorǵalý deńgeiin qamtidy. Sondai-aq jeke tulǵalar arasyndaǵy janjaldardy sheshý kezinde zorlyq-zombylyqtyń qanshalyqty jii qoldanylatynyna nazar aýdarylady.
Bul baǵytta Qazaqstan Frantsiia, Italiia, Portýgaliia, Grýziia, Túrkiia jáne Resei siiaqty birqatar Eýropa men Aziia elderinen ozyp tur.
Qazaqstan jalpy reitingte neshinshi orynda?
Qoǵamdyq tártip pen qaýipsizdik kórsetkishi World Justice Project uiymynyń Quqyq ústemdigi indeksine kiredi. Bul indeks segiz baǵyt boiynsha baǵalanady.
Qaýipsizdikten bólek, zertteý azamattardyń negizgi quqyqtarynyń saqtalýyn, sybailas jemqorlyqqa qarsy kúresti, memlekettik organdardyń ashyqtyǵyn, sot júiesiniń jumysyn jáne zań talaptarynyń oryndalýyn baǵalaidy.
Jalpy reitingte Qazaqstan 143 el men aýmaqtyń arasynda 67-orynǵa ie boldy.
Zertteý halyq pen tiisti sala mamandary arasynda júrgizilgen saýalnamalarǵa negizdelgen. Baǵalaý 44 kórsetkish boiynsha qalyptastyrylady.
2026 jylǵy Quqyq ústemdigi indeksiniń jalpy reitinginde Daniia kósh bastady. Odan keiingi oryndarǵa Norvegiia, Finliandiia, Shvetsiia jáne Liýksembýrg jaiǵasty.
