Prezident Qasym-Jomart Toqaev ózge óńirlerden Soltústik Qazaqstan oblysynyń Qyzyljar aýdanyna qonys aýdarǵan azamattarmen kezdesti, dep habarlaidy "Ult aqparat" Aqordaǵa silteme jasap.
Prezident memlekettik qoldaýmen Soltústik Qazaqstan oblysyna qonys aýdarǵan azamattarmen kezdesti. Olarǵa arnap Qyzyljar aýdanynyń Chapaevo aýylynda baspana salý jónindegi pilottyq joba júzege asyrylǵan bolatyn. Búgin Memleket basshysy jańa turǵyn úilerdi aralap kórdi.
Qasym-Jomart Toqaev kelesi jyldan bastap aýyl ákimderi tuńǵysh ret sailanatynyn, bul bastama demokratiianyń aiqyn kórinisi ekenin aitty.
«Ákimder aýyldaǵy problemalardy bárinen jaqsy biledi. Sondyqtan aýyl turǵyndary ózderiniń máselelerin eń aldymen sizderge aitady. Kóptegen aryz-shaǵymdardy jergilikti jerde sheshýge bolady. Ásirese aýyldyq jerlerde aýyzsý máselesin sheshý óte ózekti. Sonymen qatar «Jumyspen qamtýdyń jol kartasy» baǵdarlamasyn júzege asyrý mańyzdy. Sonyń nátijesinde jergilikti jerlerdegi infraqurylym damidy, jańa jumys oryndary ashylady. Oblysta bul másele tiisti deńgeide iske asyrylyp jatyr», – dedi Memleket basshysy.
Prezident memlekettik qyzmet kórsetý júiesi men memlekettik basqarý máselesine de toqtaldy.
«Men Qazaqstan halqyna arnaǵan Joldaýymda memlekettik qyzmet júiesi jabyq bolmaýy kerek ekenin aittym. Bizge oiy ushqyr, aqyldy jastar kerek. Bizde Tuńǵysh Prezidentimizdiń saiasatynyń arqasynda óte jaqsy bilim alǵan jastar kóp. Sondyqtan biz Memlekettik qyzmetke jastardy shaqyramyz», – dedi Qasym-Jomart Toqaev.
Oblys ákimi Qumar Aqsaqalov Prezidentke ózge óńirlerden kóship kelgen dáriger, muǵalim, mehanizator jáne basqa da mamandyq ielerine granttar beriletinin, sondai-aq, olar jańa jaldamaly baspanamen jáne jumyspen qamtamasyz etiletinin aitty.
Aýyldarda baspana salýǵa baǵyttalǵan oblystaǵy atalǵan pilottyq jobanyń júzege asyrylyp jatqanyna eki jyl boldy. Byltyr atalǵan joba aiasynda eldi mekenderde 428 úi salynsa, biyl 788 baspana turǵyzylady. Byltyr oblysqa 736 otbasy, barlyǵy 2,2 myń adam kóship kelgen. Biyl 700 otbasy nemese 2,4 myń adam qonys aýdarmaq.
Kezdesý sońynda aýyl ákimderi men óńirge jańadan qonys aýdaryp kelgen turǵyndar memleket tarapynan qoldaý kórsetilip jatqany úshin Qazaqstan Prezidentine alǵys bildirdi.
