Qazaqstan Prezidenti Qasym-Jomart Toqaev «Shevron» kompaniiasy direktorlar keńesiniń tóraǵasy jáne bas atqarýshy direktory Maikl Ýirtti qabyldady, dep habarlaidy Aqorda.
Qasym-Jomart Toqaev beinebailanys formatynda «Shevron» kompaniiasy direktorlar keńesiniń tóraǵasy jáne bas atqarýshy direktory Maikl Ýirtpen kezdesý ótkizdi.
Kezdesý barysynda «Shevron» kompaniiasynyń Qazaqstanmen aradaǵy ózara is-qimyldardyń perspektivasy, áli jalǵasyp jatqan COVID-19 pandemiiasy jaǵdaiynda kómirsýtegi sektoryndaǵy birqatar jobany iske asyrý máseleleri, sondai-aq, álemdik energetika naryǵynyń ahýaly talqylandy.
Memleket basshysy «Shevron» kompaniiasymen yntymaqtastyqty jáne onyń Qazaqstan ekonomikasyn damytýǵa qosqan úlesin joǵary baǵalady.
«Shevron» kompaniiasy Teńiz jáne Qarashyǵanaq munai-gaz sektoryndaǵy iri jobalardy iske asyrýda senimdi seriktes retinde elimizdiń energetika naryǵynda óte belsendi qyzmet atqarýda. Ókinishke qarai, koronavirýs pandemiiasy munai jáne gaz indýstriiasyna keri áseri etip, munaiǵa degen suranys pen usynys arasyndaǵy tepe teńdikti buzdy jáne onyń baǵasyn tómendetti», - dedi Qasym-Jomart Toqaev.
Prezident 2022 jylǵa qarai Teńiz ken ornyndaǵy óndiris qýatyn keńeitý jónindegi jobalardy ýaqytyly iske qosý Qazaqstan úshin mańyzdy ekenin aitty. Memleket basshysy kompaniianyń jobany iske asyrý qyzmetin quptap, birqatar mindetterdiń merziminen buryn oryndalyp jatqanyn atap ótti.
Sonymen qatar koronavirýs pandemiiasyna qarsy is-qimyl máseleleri talqylandy. Memleket basshysy koronavirýs infektsiiasyn jappai juqtyrýdyń aldyn alý boiynsha joǵary deńgeide úilestirilgen jumysy jáne sanitarlyq-epidemiologiialyq jaǵdaidy turaqtandyrǵany úshin «Teńizshevroil» kompaniiasyna rizashylyǵyn bildirdi. Prezident Qazaqstannyń Densaýlyq saqtaý ministrligine jalpy quny 20 million AQSh dollary bolatyn meditsinalyq buiymdardy, dári-dármekter men qorǵanysh quraldaryn bergeni, sheteldik dárigerler men epidemiologtardyń elimizge kelýin uiymdastyrǵany, sondai-aq, Qulsary qalasynda 200 oryndyq infektsiialyq aýrýhana qurylysyn qarjylandyrǵany úshin Maikl Ýirtke alǵys aitty.
Budan bólek, Qasym-Jomart Toqaev Teńizdegi jobalardy iske asyrýda qazaqstandyq úlesti qamtamasyz etýdiń mańyzdy ekenine nazar aýdardy. Bul rette, birlesken investitsiialyq jobalardy iske asyrý barysynda Jergilikti úles qoryn qurý jaǵyn qarastyrýdy usyndy.
Memleket basshysy Qarashyǵanaq munai ken ornyn igerý máselelerine toqtalyp, atalǵan jobany ýaqytyly iske asyrýdy qamtamasyz etý jáne jylyna munai óndirý kólemin 10-11 million tonna mólsherinde ustap turý qajettigin atap ótti.
Maikl Ýirt 2019 jyly Qasym-Jomart Toqaevpen Nur-Sultan jáne Niý-Iork qalalarynda áńgimelesken sátterin eske alyp, kezdesýge taǵy da múmkindik bergeni úshin alǵys aitty.
«Bizdiń kóp jylǵy áriptestigimizdi joǵary baǵalaimyn. Qazaqstan – biz úshin erekshe el jáne kompaniiamyzdyń jumysyndaǵy asa mańyzdy baǵyt. Sondyqtan biz Qazaqstannyń energetika salasyndaǵy, atap aitqanda, Teńiz jáne Qarashyǵanaq ken oryndaryndaǵy ózara is-qimyldardy jalǵastyrýǵa niettimiz. Qazaqstan – munai-gaz resýrstary bar keremet el jáne biz túrli jobalardy iske asyrýda elińizdiń senimdi seriktesi bolǵanymyzǵa qýanyshtymyz», – dedi «Shevron» kompaniiasynyń atqarýshy direktory.
