Qasym-Jomart Toqaev «Aqorda» rezidentsiiasynda Prezidenttik jastar kadr rezerviniń múshelerimen kezdesý ótkizdi. Kezdesýge rezervke engen 300 adam shaqyryldy. Bul týraly Aqordanyń baspasóz qyzmeti habarlady.
Memleket basshysy is-sharaǵa qatysýshylar aldynda sóilegen sózinde Prezidenttik kadr rezervin qurý týraly bastama óziniń sailaýaldy baǵdarlamasyndaǵy negizgi baǵyttardyń biri bolǵanyn atap ótti.
– Sizderdiń árqaisysyńyz joǵary kásibi biliktilikterińizdi kórsetip, memleket igiligi úshin adal qyzmet etýge nietti ekenderińizdi dáleldedińizder. Sondyqtan sizdermen kezdesip, elimizdegi ózekti máseleler boiynsha pikirlerińizdi tyńdap, kadr rezervine engen azamattardyń aldynda turǵan mindetter jóninde óz oiymdy bildirý úshin barshańyzdy «Aqordaǵa» arnaiy shaqyryp otyrmyn, – dedi Qasym-Jomart Toqaev.
Memleket basshysy Táýelsizdik jyldarynda Tuńǵysh Prezident – Elbasy Nursultan Nazarbaevtyń basshylyǵymen elimizde memlekettik basqarýdyń júiesi qalyptasqanyn aitty. Bul júie talai qiyn kezeńderde óziniń tiimdiligin birneshe ret dáleldedi.
Qazaqstan Prezidenti qazirgi zamanǵy syn-qaterlerdi eskere otyryp, memlekettik apparat jumysyna jańa ádisterdi engizý qajet dep sanaidy.
– Barlyq jańalyqtyń ortaq maqsaty – halyqqa jaqyn bolý. Shyn máninde, biz memleket qyzmetiniń servistik modeli jaiynda áńgime qozǵap otyrmyz. Qazaqstanǵa qoǵamnyń talap-tilegine durys, tiimdi jáne ádiletti jaýap beretin memlekettik basqarýdyń jańa úlgisi kerek, – dedi Memleket basshysy.
Qasym-Jomart Toqaev memlekettik basqarýdy reformalaý jaiynda aita kelip, biylǵy jyldan bastap memlekettik qyzmetshilerdiń sany birtindep qysqaratynyn, únemdelgen qarajat tiimdi jumys isteitin qyzmetkerlerdi materialdyq turǵydan yntalandyrýǵa jumsalatynyn atap ótti.
– Qazaqstan halqyna arnalǵan Joldaýda aitqanymdai, 2024 jylǵa qarai memlekettik qyzmetshilerdiń, sonymen qatar ulttyq kompaniialar qyzmetkerleriniń sanyn 25 paiyzǵa qysqartý kózdelip otyr. Árine, bul birjaqty jasalmaidy, olardyń atqaratyn qyzmetin qaita qarap, iaǵni, memlekettik organdardyń qyzmetine jatpaityn mindetterdi aýtsorsing pen azamattyq qoǵam ókilderine júktei otyryp qysqartamyz, – dedi Qazaqstan Prezidenti.
Memleket basshysy óz baiandamasynda «Halyq únine qulaq asatyn memleket» tujyrymdamasynyń negizgi úsh qaǵidatyna, atap aitqanda, ashyqtyq, inkliýzivtilik jáne azamattardyń suranystaryna jedel jaýap berý máselelerine erekshe nazar aýdardy.
– Qazaqstan azamattary sheneýnikterdi qoǵamǵa qatysty barlyq sheshimderdi bilik dálizderinde qabyldaityn qandai da bir tańdaýly top retinde qaramaýy kerek. Sheneýnikter qoljetimdi bolýy qajet. Memlekettik qyzmetshi halyqtyń ortasynda halyq úshin jumys isteitin halyqtyń bir bóligi deýden esh jalyqpaimyn! – dep málimdedi Qasym-Jomart Toqaev.
Memleket basshysy Prezidenttik kadr rezerviniń árbir múshesinen eldi damytýǵa tyń serpin beretin jańa ideia men nátijeli jumys kútetinin jetkizdi.
– Aldaǵy ýaqytta sizderdi memlekettik organdar men ulttyq kompaniialarǵa jaýapty qyzmetke jiberemiz. Qazirdiń ózinde rezervke ótken elý bes azamat jańa qyzmetke taǵaiyndaldy, – dedi Prezident.
Qasym-Jomart Toqaev biyl rezervtegi 100 adamdy jaýapty qyzmetke taǵaiyndaýdy, aldaǵy jyldarda kadrlyq rezervtiń áleýetin tolyq paidalanýdy josparlap otyrǵanyn aitty.
Qazaqstan Prezidenti elimizde júrgiziletin aýqymdy transformatsiialar naqty salalardaǵy, óńirlerdegi, qalalar men aýyldardaǵy kishkentai ózgeristerden bastalatynyn atap ótip, jastardy atqaratyn qyzmetine qaramai memleketti jańǵyrtý protsesine óz úlesterin qosýǵa shaqyrdy.
– Búgingi jas býynnyń, onyń ishinde sizder de bilikke keletin ýaqyt alys emes. Sizder memleketti basqarý tizginin alýǵa daiyn bolyp, tiisti bilim men bilikti meńgerýlerińiz qajet. Jastarymyz el damýynyń jańa tarihi kezeńine daiyn bolýy kerek. Bilim men bilik órshildikten biik turýy tiis, – dedi Memleket basshysy.
Qasym-Jomart Toqaev sózin elimizdiń barlyq jastaryna arnai otyryp, jańarý úderisi óziniń ishki saiasattaǵy basym baǵyttarynyń biri ekenin aitty.
– Kadr rezervin jasaqtaý jumystary munymen toqtap qalmaidy, jalǵasa beredi. Onyń qataryna yntaly jáne laiyqty jastar kiredi, – dedi Prezident.
Kezdesý sońynda Memleket basshysy kadr rezervine kirgen jastardyń ózderine júktelgen mindetterdi laiyqty atqaratynyna senimdi ekenin taǵy da qaitalap aitty.
Shara barysynda Memlekettik qyzmet isteri agenttiginiń tóraǵasy Anar Jaiylǵanova, Prezidenttik jastar kadr rezerviniń músheleri – «Astana» halyqaralyq qarjy ortalyǵy Birjasynyń qarjy direktory Renat Bekturov, Japoniianyń ulttyq saiasi zertteýler institýtynyń doktoranty Zúlfiia Súleimenova, «Eurasia Blockchain Fintech Group Limited» kompaniiasynyń bas direktory Tilektes Adambekov, «Óskemen qalalyq bilim bólimi» memlekettik mekemesi Qamqorshylyq jáne qorǵanshylyq organy, balalardyń quqyqtaryn qorǵaý sektorynyń meńgerýshisi Iýliia Ovechkina jáne «BTS Digital» JShS bilim berý ortalyǵynyń konsýltanty Oljas Sákenov sóz sóiledi.
Qasym-Jomart Toqaevtyń sóilegen sóziniń tolyq nusqasymen myna silteme arqyly tanysa alasyzdar.
