Memleket basshysy Qasym Jomart-Toqaev Portýgaliia Respýblikasynyń qaita sailanǵan Prezidenti Marselý Rebelý de Soýzany quttyqtady, dep habarlaidy Aqorda.
Qasym Jomart-Toqaev Qazaqstan halqynyń jáne jeke óz atynan Marselý Rebelý de Soýzany Portýgaliia Respýblikasynyń Prezidenti laýazymyna qaita sailanýymen quttyqtap, jedelhat joldady.
– Sailaýdaǵy jeńisińiz – halqyńyzdyń Sizge jáne Portýgaliianyń saiasi-ekonomikalyq turaqtylyǵy men onyń halyqaralyq bedelin nyǵaitýǵa baǵyttalǵan sarabdal saiasatyńyzǵa degen seniminiń aiqyn dáleli ekeni sózsiz. Osy tusta Sizdiń qajyrly eńbegińiz elińizdi búgingiden de biik belester men tyń tabystarǵa jetelei berýine tilektestigimdi bildiremin. Qazaqstan men Portýgaliia arasyndaǵy dástúrli dostyq pen mazmundy saiasi dialogty, áleýeti joǵary saýda-ekonomikalyq jáne mádeni-gýmanitarlyq yqpaldastyqty odan ári damytý maqsatynda Sizben birge kúsh-jiger jumyldyratynymyzǵa senimim mol, – delingen jedelhatta.
Sonymen qatar Prezident Portýgaliia Respýblikasynyń Eýropalyq Odaq Keńesindegi jaqynda bastalǵan tóraǵalyǵyna tolaǵai tabys tilep, Qazaqstan men EO arasyndaǵy Keńeitilgen seriktestik pen yntymaqtastyq týraly kelisim negizindegi jan-jaqty bailanystardyń óristei túsetinine zor úmit artatynyn atap ótti.
