Foto: Aqorda
Memleket basshysy Qasym-Jomart Toqaev Astanany damytý máseleleri jónindegi keńeste elordanyń áleýmettik-ekonomikalyq kórsetkishterine toqtaldy, dep habarlaidy Ult.kz.
Prezidenttiń aitýynsha, biylǵy jyldyń qorytyndysy boiynsha Astananyń óńirlik jalpy ónim kólemi 34–35 milliard dollarǵa jetýi múmkin.
Prezident sońǵy 11 aida qysqa merzimdi ekonomikalyq indikator 118,6 paiyzdy quraǵanyn atap ótti. Onyń aitýynsha, investitsiia tartý, qurylys, sondai-aq shaǵyn jáne orta biznesti damytý kórsetkishteri boiynsha Astana elimizde kósh bastap tur.
– Biyl elordada 5 millionǵa jýyq sharshy metr turǵyn úi paidalanýǵa beriledi. Bul – respýblika boiynsha salynǵan baspananyń tórtten biri. Sonymen qatar bul kórsetkish Ortalyq Aziiadaǵy basqa astanalarmen salystyrǵanda birneshe ese joǵary, – dedi Memleket basshysy.
Sondai-aq 2025 jyldyń 11 aiynda óńdeý ónerkásibi óniminiń kólemi 2,8 trillion teńgege jetip, 7,2 paiyzǵa ósken. Saýda kólemi 10,8 trillion teńgeden asyp, 8,4 paiyz ósim kórsetken. Al qala biýdjetine túsken salyq kólemi 4,3 trillion teńgeni quraǵan.
Prezidenttiń málimetinshe, 2024 jyly Astananyń óńirlik jalpy ónimi 15 trillion teńgeden asyp, shamamen 32 milliard dollar bolǵan. Biyl bul kórsetkish 17 trillion teńgege deiin jetýi múmkin. Qazirgi tańda elorda halqynyń resmi sany 1,6 million adamǵa jetken.
Memleket basshysy jan basyna shaqqandaǵy óńirlik jalpy ónim kórsetkishiniń de oń ekenin aitty. Oxford Economics uiymynyń 2025 jylǵy indeksine sáikes, Astana Aziia qalalary arasynda 36-orynǵa, al álem boiynsha 276-orynǵa turaqtaǵan.
– Bul jetistikke toqmeiilsýge bolmaidy. Áleýetimiz zor, aldaǵy ýaqytta reitingtegi ornymyzdy jaqsartýǵa tolyq múmkindik bar. Astana basqa óńirlerge úlgi bolýy tiis, – dedi Prezident.
Qasym-Jomart Toqaev elordanyń ekonomikalyq belsendiligi artyp kele jatqanyn aityp, soǵan sáikes ákimdik pen jaýapty memlekettik organdarǵa jańa mindetter júkteletinin atap ótti.
