Memleket basshysy koronavirýspen kúreste aqparattyq jumystardyń mańyzdy ról atqaratynyn aitty, – dep habarlaidy «Ult aqparat».
Bul týraly Prezidenttiń baspasóz hatshysy Berik Ýáli Feisbýk paraqshasynda jazdy.
«Der kezinde habarlap, tiisti sharalar qabyldaýǵa kóp nárse bailanysty. Bastapqy kezeńde bul jumystar jaqsy uiymdastyryldy. Biraq memlekettik organdar sońǵy kezde bul isti bosańsytyp jiberdi.
Koronavirýs boiynsha úsh ai buryn arnaiy qurylǵan Respýblikalyq kommýnikatsiialyq ortalyq qazirgi ýaqytta is júzinde jumys istemeidi. Osyǵan sáikes, búginde biryńǵai naqty aqparattar deregi joq. Indetke qarsy kúreste jaýapty sheneýnikter teris aqparat berip, halyqty odan ári adastyrady. Eń jamany osy.
Ákimder men ministrler qarapaiym halyqpen bailanys ornatýdy qoidy. Olardyń aryz-shaǵymdaryna der kezinde jaýap bermeidi. Sondyqtan turǵyndardyń kópshiligi qaida bararyn bilmei, toryǵýda», – dedi Prezident.
