Prezident Qasym-Jomart Toqaev saltanatty jiynǵa qatysýshy sportshylar men bapkerlerdi Parij Olimpiadasyndaǵy jetistikterimen quttyqtap, árbir jeńis zor erik-jiger men qajyrly eńbektiń jemisi ekenine nazar aýdardy, dep habarlaidy Aqordanyń baspasóz qyzmeti.
Memleket basshysy, eń aldymen, Olimpiada chempiony Eldos Smetovtiń jeńisine erekshe toqtaldy.
"Ol bairaqty básekeniń alǵashqy kúnderi Jaqsylyq Úshkempirovtiń dańqty jolyn jalǵady. El tarihynda tuńǵysh ret dziýdodan Olimpiadanyń altyn medalin aldy. Eldos baýyrym, sen Olimpiadaǵa attanar aldynda maǵan jáne barlyq sport jankúierlerine bar kúsh-jigerimdi jeńiske jetý úshin jumsaimyn dep ýáde berdiń. Sózińde turdyń. Naǵyz jigitsiń! Biz bárimiz seni maqtan tutamyz. Shyn máninde, qatarynan úsh ret Olimpiada júldegeri ataný – naǵyz chempionnyń qolynan keletin erlik. Seniń jeńisti jolyń sportshylarymyzǵa jiger berdi, barsha halqymyzdy qýanyshqa bóledi", – dedi Prezident.
Qasym-Jomart Toqaev tórtjyldyqtyń dodasynan júldemen oralǵan ózge sportshylarǵa, bapkerler men atletterdi daiyndaýǵa úles qosqan azamattarǵa alǵys aitty.
"Nariman Qurbanovtyń kúmis júldesin tarihi jetistik deýge bolady. Gimnastika sheberleri tuńǵysh ret Olimpiada biigin baǵyndyryp otyr. Demeý Jadyraev pen Nurbek Oralbai tamasha óner kórsetti. Mergenderimiz Aleksandra Le men Islam Sátbaev nysana kózdeýden qola medal aldy. Bul – 28 jyldan beri elimizdiń osy sport túrinen alǵan alǵashqy júldesi. Balýan Ǵusman Qyrǵyzbaev pen boksshy Nazym Qyzaibai júldegerler qataryna qosyldy. Jalpy barlyq memleket Olimpiadaǵa eń myqty sportshylaryn jiberedi. Shyn máninde, júzden júirik, myńnan tulpar shyǵyp, álemdik básekede jeńiske jetý ońai emes. Mundai jahandyq dodada el qorjynyna túsken ár medaldiń orny airyqsha. Sondyqtan búgin men Olimpiada júldesine ie bolǵan barsha sportshylarymyzǵa shynaiy rizashylyǵymdy bildiremin. Jeńis jolynda sportshy ǵana emes, sol salanyń kóptegen mamandary da ter tógedi. Men bapkerlerge, sportshylardy daiyndaýǵa úles qosqan basqa da kásip ielerine alǵys aitamyn. Ulttyq Olimpiada komitetiniń basshylary jumysqa jańa serpin berip, halyqaralyq yntymaqtastyqty damytý úshin mańyzdy qadam jasady. Jaýapty sátterde sportshylarymyzdyń qasynda bolyp, qoldaý kórsetti. Ulttyq Olimpiada komiteti bastaǵan isti jalǵastyryp, aldaǵy ýaqytta naqty nátijege jetedi dep oilaimyn", – dedi Memleket basshysy.
Prezidenttiń aitýynsha, Parijdegi báseke olimpiadalyq sport túrlerin odan ári qoldaý mańyzdy ekenin kórsetti. Óitkeni keibir sportshylarymyz jeńis tuǵyryna qolsozym jerden toqtady, úzdik ondyqtan kórindi. Bul olardyń sheberligin ári jeńiske degen erik-jigerin baiqatady. Áitse de, Memleket basshysynyń pikirinshe, kásibi sportta sheshimin kútken túitkildi máseleler de barshylyq.
"Memleket eń joǵary deńgeidegi sportshylardy daiyndaýǵa jetkilikti mólsherde qarjy bóledi. Sondyqtan jurtshylyqtyń halyqaralyq jarystarda keibir sport túrlerinen júlde kútýi – zańdylyq. Salalyq vedomstvo sporttyń olimpiadalyq túrlerin damytý isinde ketken júieli qatelikterdi egjei-tegjeili taldaýǵa tiis. Keshendi reforma jasaityn ýaqyt keldi. Al ony júzege asyrý úshin quzyretti ministrlik, Ulttyq olimpiada komiteti jáne sport federatsiialary úilesimdi áreket etýi kerek. Sportta ádil básekelestik rýhy saltanat qurýy qajet. Jemqorlyqpen tabandy túrde kúresip, joǵary nátijege qol jetkizýge kedergi keltiretin protektsionizm sekildi faktorlardan irgeni aýlaq salǵan jón", – dedi Qasym-Jomart Toqaev.
Memleket basshysy buqaralyq, sondai-aq balalar men jasóspirimder sportyna basa mán berý qajet ekenin aitty.
"Bul – óte mańyzdy mindet. Sebebi buqaralyq sportty damytý arqyly biz kásibi sportqa jol ashamyz jáne eń bastysy, ult saýlyǵyn jaqsartamyz. Sondyqtan memleket sport infraqurylymyn damytý úshin tiisti qarajat bólýde, iaǵni balalardyń jastaiynan alańsyz sportpen shuǵyldanýyna qajetti jaǵdaidy jasap jatyr. Elimizdiń aimaqtarynda 20 myńnan astam sport alańdary jumys istep tur, 16 myńnan asa arnaiy keshender men zaldar bar. Osy nysandardyń barlyǵy tolyqqandy qyzmet etýge tiis jáne sportpen ainalysamyn degen árbir adamǵa qoljetimdi bolýy kerek. Barlyq oblys ortalyǵynda jáne aýdandarda fýtbol, boks, kúres, basketbol, voleibol, sadaq atý, ústel tennisi, shahmat jáne taǵy da basqa tanymal sport túrleriniń sektsiiasy bolýǵa tiis. Bul – ákimderdiń mindeti. Al Úkimet sport nysandarynyń jumys tiimdiligine saraptama júrgizip, osy másele boiynsha tiisti sharalar qabyldaǵany durys", – dedi Prezident.
