Foto: Aqordanyń baspasóz qyzmeti
Prezident Batys Qazaqstan oblysyna jumys sapary barysynda álemdegi eń iri munai-gaz kondensat ken oryndarynyń birin igerip jatqan «Qarashyǵanaq Petroliým Opereiting B.V» konsortsiýmynyń jumysymen tanysty, dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaevqa Qarashyǵanaqty keńeitý jobasy tanystyryldy.
«Qarashyǵanaq Petroliým Opereiting B.V» bas direktory Djankarlo Rýiýdyń aitýynsha, Qarashyǵanaqty keńeitý jobasynyń 2021-2024 jyldarǵa josparlanǵan alǵashqy kezeńinde 5-shi gazdy qaita aidaý kompressory men basqa da óndiris nysandarynyń qurylysy júrip jatyr. Jobanyń bul kezeńinde 970 million dollar investitsiia quiylyp, 3500-ge jýyq adam jumysqa tartylady. Al jobanyń 2023-2026 jyldarǵa josparlanǵan kelesi kezeńinde 6-shy gazdy keri aidaý kompressorynyń qurylysy júrgiziledi. Bul kezeńde 735 million dollar qarjy jumsalyp, 1300 jańa jumys orny ashylady.
Jalpy, Qarashyǵanaqty keńeitý jobasy suiyq kómirsýtegin óndirý deńgeiin 46 million tonnaǵa deiin ulǵaityp, Qazaqstan Respýblikasy men Qarashyǵanaq jobasynyń seriktesterine qosymsha tabys tabýǵa múmkindik beredi.
Sondai-aq konsortsiým seriktesteri qazir Energetika ministrligimen birlesip, jańa gaz óńdeý zaýytynyń tehnikalyq-ekonomikalyq negizdemesin ázirlep jatyr. Eger gazdy keshendi túrde óńdeitin zaýyt salynsa, jylyna 4 milliard tekshe metrge deiin gaz jáne 0,5-0,6 million tonna propan-býtan fraktsiiasyn óndirip, elimizdiń energetikalyq áleýetin aitarlyqtai ulǵaitýǵa múmkindik týady.
Memleket basshysy jańa gaz óńdeý zaýytynyń qurylysy óte mańyzdy ekenin atap ótti. Sondai-aq Qarashyǵanaq ken ornynyń elimizdegi munai-gaz indýstriiasyn órkendetýdegi jáne áleýmettik-ekonomikalyq salasyn damytýdaǵy úlesi zor ekenine nazar aýdardy.
1997 jyly Ónimdi bólisý týraly túpkilikti kelisimge qol qoiylǵaly beri investorlar Qarashyǵanaq ken ornyn igerýge 30 milliard dollarǵa jýyq qarjy quiǵan.
Óńirdegi eń iri kásiporyn sanalatyn «Qarashyǵanaq Petroliým Opereiting B.V» 3,8 myń adamdy turaqty jumyspen qamtyp otyr. Al konsortsiýmǵa túrli qyzmet kórsetip, ónim jetkizetin 142 merdiger mekemede 20 myńǵa jýyq adam eńbek etedi. Joba júzege asyryla bastalǵaly beri QPO el ekonomikasyna 57,4 milliard dollar kóleminde tabys ákeldi. Onyń ishinde 45,9 milliard dollar biýdjetke salyqtar, tólemder jáne ónimdegi úles esebinen tústi.
Jalpy, «Qarashyǵanaq Petroliým Opereiting B.V» 1998 jyldan beri óńirdegi áleýmettik-infraqurylymdyq jobalarǵa 754,5 million dollar bólgen. Bul qarjyǵa Batys Qazaqstan oblysy boiynsha 16 aýrýhana men emhana, 3 dene shynyqtyrý-sport kesheni, 34 mektep pen balabaqsha, teatrlar jáne mádeni ortalyqtar jáne basqa da infraqurylymdar salynǵan.
