Qasym-Jomart Toqaevtyń tóraǵalyǵymen Ishki ister ministrliginiń keńeitilgen alqa májilisi ótti. Jiynda biylǵy 9 aida ishki ister organdary atqarǵan jumystyń qorytyndylary jáne Prezident tapsyrmalaryn oryndaý barysy qaraldy.
Sharaǵa IIM qyzmeti men politsiianyń aýmaqtyq departamentteriniń basshylary jáne elimizdiń barlyq aimaqtarynyń ýchaskelik inspektorlary qatysty.
Memleket basshysy jiynǵa deiin ishki ister organdaryna qarasty arnaiy tehnikalardy qarap shyǵyp, Nur-Sultan qalasy Politsiia departamenti Jedel basqarý ortalyǵynyń qyzmetimen tanysty.
Prezident koronavirýs pandemiiasy kezinde ýaqytpen sanaspai óz mindetterin abyroimen atqarǵan ishki ister organdarynyń barlyq qyzmetkerlerine rizashylyq bildirdi.
Memleket basshysy IIM júiesindegi kúndelikti jumystyń qaýip pen qaterge toly ekenin atap ótti. Prezidenttiń aitýynsha, Táýelsizdik jyldarynda óziniń qyzmettik mindetterin oryndaý kezinde 797 politsei qaza taýyp, 2604 qyzmetker aýyr dene jaraqattaryn alǵan.
– Memlekettiń turaqtylyǵyn jáne qoǵamnyń bereke-birligin saqtaý – basty mindet. Osyndai sátte politsiia qyzmetkerleriniń kásibi deńgeiine, otanshyldyq rýhyna, qajyr-qairatyna kóp nárse bailanysty. Muny ishki ister organdarynyń barlyq qyzmetkerleri jete túsinedi dep oilaimyn, – dedi Prezident.
Qasym-Jomart Toqaevtyń pikirinshe, biyl Qordai aýdanynda jáne Sátpaev qalasynda bolǵan qaiǵyly oqiǵalardan sabaq alý qajet.
– Beibit kúnde halqymyzdyń amandyǵyn, bereke-birligin saqtai almasaq, memleketimizge syn. Ultaralyq kelisim men tatýlyq, qoǵamdaǵy turaqtylyq – bizdiń basty qundylyqtarymyz. Halyqtyń kóńili alańsyz, uiqysy tynysh bolýy kerek. Politsiia tártip saqshysy ekenin sóz júzinde emes, is júzinde dáleldei bilýge tiis, – dedi Memleket basshysy.
Prezident ishki ister organdary men azamattardyń ózara qarym-qatynasynda qyzmet kórsetý modelin engizý mańyzdy ekenin, oǵan «politsiia qadamdyq qoljetimdilikte» qaǵidatyn negizge alý kerektigin atap ótti.
– Ýchaskelik inspektor – belgili bir aýmaqtaǵy qylmysty boldyrmaýda, jergilikti halyqtyń máselelerin sheshýde, qylmystyń tikelei nemese janama túrde aldyn alýda, azamattardyń ómir sapasyn arttyrýda basty tulǵa sanalady. Halyqpen ashyq dialog júrgizý kerek. Olardyń jergilikti politsiiadan ne kútetinin bilip, kómek kerek kezinde qastarynan tabylýy qajet. Otandastarymyzdyń senimine basqasha ie bolý múmkin emes, – dedi Qasym-Jomart Toqaev.
Memleket basshysy qurylymdyq ózgeristerdi jalǵastyra berýdi, onsyz qolǵa alǵan reformalardy tabysty júzege asyrý múmkin emes ekenin aitty. Onyń oiynsha, politsiia qosalqy fýnktsiialardan ókinbesten bas tartýy kerek.
– Qazir politsiia tikelei óz mindetterine jatpaityn jumystarmen ainalysatyn ýaqyt emes. Bul baǵytta alǵashqy qadam jasaldy. IIM-niń quramynan tótenshe jaǵdailar jónindegi qyzmet bólindi. Ishki ister organdary qurylymdaryn odan ári ońtailandyrý jumystary Quqyq qorǵaý jáne sot júiesin reformalaý jónindegi komissiianyń sheńberinde júzege asyrylatyn bolady. Biraq bul politsiianyń qyzmetin álsiretý degen sóz emes. IIM jáne onyń qurylymdyq bólimsheleri tártipti qamtamasyz etýde memlekettiń negizgi tirek kúshi bolǵan jáne solai bola beredi, – dedi Prezident.
Memleket basshysy kadr saiasatyna basa mán berdi. Ol politsiia qyzmetin jańǵyrtý jónindegi jol kartasy aiasynda vedomstvolyq oqytý mekemeleri qaita uiymdastyrylyp, qyzmetkerlerdi irikteý jumysy jetildirilgenin atap ótti.
– Politsiiada dórekilik pen biliksizdikke jol berilmeýi kerek. Munda joǵary daiyndyqpen kelgen jáne óz isine shynaiy berilgen mamandar jumys isteýi qajet. Memleket pen qoǵam ońtaily ózgeristerdi kútip otyr. Tártip saqshylary azamattarǵa úlgi bolýǵa tiis, – dedi Qasym-Jomart Toqaev.
Prezident politsiia qyzmetin tsifrlandyrý, zańsyz esirtki ainalymymen kúresti kúsheitý, túzetý júiesiniń jaǵdaiyn jaqsartý kerek ekenin málimdedi.
– Eldegi kúrdeli áleýmettik-ekonomikalyq jaǵdaida qylmystyń órshýine jáne túrme «tártibiniń» taralýyna múlde jol berýge bolmaidy. Ondaǵy jaǵdaidyń asa máz emes ekeni málim. Bas bostandyǵynan aiyrmai jazalaýǵa qatysty túitkilder bar. Ministrlik qylmystyq-atqarý júiesindegi máselelerdi sheshý boiynsha nátijeli jumystar kórsetýi kerek, – dedi Memleket basshysy.
Prezident óz sózinde Qazaqstan Táýelsizdiginiń 30 jyldyǵyna orai, zańǵa sáikes, azamattarǵa jáne jalpy memleketke qaýip keltirmeitin qylmys jasaǵan adamdarǵa amnistiia jasalatynyn jetkizdi.
Sondai-aq Qasym-Jomart Toqaev Úkimetke elordalyq politsiia departamentine jańa ǵimarat salý máselesin tapsyrdy.
Memleket basshysy politsiia qyzmetkerlerin jan-jaqty áleýmettik qoldaý negizgi mindetterdiń biri ekenin aitty. Prezident tártip saqshylaryna baspana jaldaýǵa ótemaqy retinde 15 milliard teńgeden astam qarjy bólinetinin jetkizdi. Keler jyldyń 1 qańtarynan bastap osy maqsattarǵa qosymsha 10 milliard teńge bólinedi. Bul shara aiasynda kezekshi bólimniń qyzmetkerleri, qaraýyl qyzmeti, arnaiy kúzet uiymdary, vedomstvolyq oqý mekemeleri jáne qylmystyq-atqarý júiesiniń qyzmetkerleri qamtylyp, jalpy 8 myń adamǵa qoldaý kórsetiledi.
Qasym-Jomart Toqaev ishki ister salasy qyzmetkerleriniń eńbekaqysy tómen ekenin aitty. Bul kópten beri qordalanǵan máselelerdi biri. Osyǵan orai ol Úkimetke 3 jyldyń ishinde tártip saqshylarynyń eńbekaqysyn 30 paiyzǵa kóterý týraly tapsyrma berdi.
Prezident barlyq memlekettik basqarý júiesine úlken synaq bolǵan COVID-19 pandemiiasy kezinde politsiia qyzmetkerleriniń erekshe eńbegin atap ótti.
– Qazirgi jaǵdaida dárigerlermen qatar maidannyń alǵy shebinde politsiia qyzmetkerleri de júr. Óitkeni azamattardyń qaýipsizdigi ǵana emes, olardyń densaýlyǵy men berekeli ómiri sizderdiń jumystaryńyzǵa tikelei bailanysty. Sondyqtan búgingidei kúrdeli jaǵdaida memleket indetke qarsy turǵandardyń barlyǵyn qoldaidy. Meniń tapsyrmam boiynsha pandemiianyń birinshi kezeńinde karantin sharalaryn qamtamasyz etýge qatysqan ishki ister organdarynyń qyzmetkerlerine syiaqy tóleýge 6,6 milliard teńge bólindi. Jyl sońyna deiin taǵy da 11,5 milliard teńge beriledi, – dedi Memleket basshysy.
Prezident sóz sońynda joǵaryda atalǵan mindetterdi tolyq oryndaý qajet ekenin aityp, IIM bul jumysty abyroimen atqaratynyna senim bildirdi.
Alqa májilisinde Ishki ister ministri Erlan Turǵymbaev sóz sóilep, Prezidentke elimizdegi qylmystyq jaǵdai, azamattardyń qaýipsizdigin qamtamasyz etý sharalary, quqyq buzýshylyqtyń aldyn alý, uiymdasqan qylmysqa qarsy is-qimyldar, adam saýdasy, esirtki jáne tonaý qylmysy jaiynda baiandady. Ministr ishki ister organdaryna reforma júrgizý, «Halyq únine qulaq asatyn memleket» tujyrymdamasy aiasynda politsiia jumysynyń jariialylyǵy men ashyqtyǵyn qamtamasyz etý sharalary jóninde Memleket basshysy bergen tapsyrmalardyń oryndalý barysy týraly da aqparat berdi.
Jiynda budan bólek Nur-Sultan qalasy Politsiia departamentiniń bastyǵy Erjan Sádenov jáne Aqtóbe oblysy Politsiia departamentiniń ýchaskelik inspektory Nariman Ýlianov baiandama jasady.
