Foto: QR MAM
Elordadaǵy Beibitshilik jáne kelisim saraiynda Qazaqstannyń eńbek sińirgen qairatkeri, tanymal estrada jáne opera ánshisi Tolqyn Zabirovanyń «Ómirge ǵashyqpyn» atty mereitoilyq kontserti ótti, dep habarlaidy Ult.kz.
Saltanatty keshke Qazaqstan Respýblikasynyń Mádeniet jáne aqparat ministri Aida Balaeva qatysty. Ministr Memleket basshysy Qasym-Jomart Toqaevtyń quttyqtaýyn jetkizdi.
Prezident óz quttyqtaýynda ánshini otandyq ónerdiń eń jarqyn ókilderiniń biri, erekshe daýys iesi retinde atap ótti.
«Siz áigili otandyq jáne álemdik operalyq týyndylar men lirikalyq ánderdi sheber oryndap, kórermenniń ystyq yqylasyna bólenip júrsiz. Erekshe tabiǵi darynyńyz jáne tynymsyz eńbegińiz arqyly elimizdiń mádeni-rýhani bailyǵynyń órisin keńeitýge qosqan úlesińiz óte mol. Kemel bilimińiz ben boiyńyzdaǵy asyl qasietterińizben zamandastarymyzdyń ortasynda syi-qurmetke bólenip júrsiz», – delingen Memleket basshysynyń quttyqtaý hatynda.
Tolqyn Zabirova – kórkemdik talǵamy men kásibi biliktiligi joǵary óner iesi.
Atalmysh kontsertte ánshiniń eń úzdik avtorlyq, zamanaýi jáne álemdik hit ánder oryndaldy. Atap aitsaq, «Vechnaia liýbov», «Adagio», «Per Amore, Per te», «Qara, maǵan qara», «Ómirge ǵashyqpyn», «Sen úshin», «Bulbul áni», «Júrek (Cover Show)», «Saǵyna beremin (Cover Show)» jáne basqa da týyndylar shyrqaldy.
2024 jyly Tolqyn Zabirova «Parasat» ordenimen marapattaldy.
