Foto: QR Oqý-aǵartý ministrligi
Astanada Jumysshy mamandyqtar jyly aiasynda Qazaqstan Respýblikasy Oqý-aǵartý ministrliginiń bastamasymen «Counseling as a Culture» taqyrybyndaǵy IC3 halyqaralyq forýmy ótti, dep habarlaidy Ult.kz QR Oqý-aǵartý ministrliginiń baspasóz qyzmetine silteme jasap.
Búginde elimizdiń bilim berý uiymdarynda 1 000-nan astam pedagog-kásibi baǵdar berýshi eńbek etýde. Forýmǵa eldiń barlyq óńirinen kelgen 200-ge jýyq maman qatysty. Olar kásibi baǵdar berý júiesindegi ózekti ózgerister men zamanaýi tásilderdi talqylady. Kanada, AQSh, Qytai, Gonkong jáne Úndistannan kelgen sarapshylar óz tájiribelerimen bólisip, kásibi baǵdar men oqýshylardy yntalandyrý salasyndaǵy tiimdi ádisterdi tanystyrdy.
«Mamandyq tańdaý – árbir adamnyń ómirindegi mańyzdy sheshim. Bul rette mektep barynsha qolaily orta qalyptastyrýy tiis. Ministrlik osy baǵytta naqty qadamdar jasaýda. Atap aitqanda, biylǵy naýryz aiynda ár mektepke pedagog-kásibi baǵdar berýshi úshin jeke shtat birligin bólý týraly buiryq qabyldandy. Qazirgi tańda mektepterde 1 159 kásibi baǵdar berýshi jumys isteidi. Jańa oqý jylynda olardyń sany 7 920-ǵa deiin artady dep kútilýde», – dedi Oqý-aǵartý vitse-ministri Edil Ospan.
Forým aiasynda oqýshylar men ata-analarǵa arnalǵan bilim kórmesi ótti. Kórmege Qazaqstan men sheteldiń jetekshi joǵary oqý oryndary qatysty. Kanada, Ulybritaniia, Italiia, AQSh, Qytai, Gonkong jáne BAÁ ýniversitetteri ózderiniń oqý baǵdarlamalaryn usynyp, qatysýshylarǵa daiyndyq baǵyttary, qabyldaý sharttary jáne bolashaqta suranysqa ie mamandyqtar týraly jan-jaqty aqparat berdi.
Uiymdastyrýshylardyń aitýynsha, kórmege 1 000-nan astam adam kelgen.
Eske sala keteiik, 2025 jyl Memleket basshysynyń bastamasymen Jumysshy mamandyqtary jyly bolyp jariialandy. Osy forým kásibi baǵdar berý júiesin damytýǵa yqpal etetin bilim men tájiribe almasýǵa arnalǵan ashyq alańǵa ainaldy.
.jpeg)