Elimizdegi meditsina ýniversitetteri doktoranttarǵa joǵarylatylǵan shákirtaqy tólemei otyr. Bul týraly QR Bilim jáne ǵylym ministrligi joǵary jáne joǵary oqý ornynan keiingi bilim departamentiniń direktory Ádilet Toibaev aitty, dep habarlaidy QazAqparat.
«Memleket basshysynyń 2019 jylǵy 10 qazanda bergen tapsyrmasy boiynsha shákirtaqy joǵary oqý oryndarynda barlyq deńgeide 25 paiyzǵa ósken bolatyn. Osylaisha, bakalavriat deńgeiinde shákirtaqy 26 186 teńgege, magistratýrada 66 913 teńgege, doktorantýrada 102 498 teńgege kóterildi. Bul shákirtaqy 2020 jyldyń 1 qańtarynan tólene bastady. Osy jyldyń 1 qyrkúieginen bastap shákirtaqy taǵy ósti. Bul Memleket basshysynyń Ulttyq qoǵamdyq senim keńesi otyrysynda bergen tapsyrmasy aiasynda iske asyrylǵan edi. Shákirtaqy mólsheri bolashaq pedagogtar men doktorantýrada bilim alýshylarǵa ulǵaityldy», - dedi ol ministrliktiń apparat keńesinde.
Onyń aitýynsha, qazirgi ýaqytta pedagogika mamandyǵy boiynsha shákirtaqy mólsheri 42 myń teńgege deiin, al doktorantýrada 150 myń teńgege deiin ósti.
«Bul pedagogikalyq mamandyqtardyń tartymdylyǵyn arttyrady jáne doktorantýrada ǵylymi-zertteý jumystarymen ainalysýǵa kóbirek múmkindik beredi dep oilaimyz. Qazirgi ýaqytta osy shákirtaqy 1 qyrkúiekten bastap pedagog mamandaryn daiyndaityn 47 JOO-nyń 45-inde berile bastady. Al eki joǵary oqý ornyna 30 qyrkúiekte joǵarylatylǵan shákirtaqy tóledi. Doktorantýra boiynsha 55 joǵary oqý orny bar. Sonyń 47-si ulǵaitylǵan shákirtaqy berdi. Al 8 JOO shákirtaqyny burynǵy deńgeimen tólegen. Olardyń kóbisi meditsinalyq ýniversitetter bolyp otyr», - dedi Ádilet Toibaev.
Komitet basshysynyń aitýynsha, bul másele boiynsha Densaýlyq saqtaý ministrligimen jumys júrgizildi. Jaqyn arada atalǵan ýniversitetter doktoranttarǵa joǵarylatylǵan shákirtaqy tóleidi.
