Foto: Májilis
Májilis depýtaty Dáýlet Muqaev 5 myń adamnan 30 mlrd teńge aldap alǵan toptyń máselesin kóterip, Bas prokýrordyń atyna saýal joldady, dep habarlaidy Kazinform agenttigi.
«Ótken jyldyń ózinde 20 444 derek tirkelip, azamattarǵa 16,5 mlrd teńgege zalal kelgen. Al biyl jyl aiaqtalmasa da, 15 myńǵa jýyq derek tirkelip, zardap kólemi 11 mlrd teńgeden asty. Olardyń qurbany - kóbine úide otyrǵan analar men qyz-kelinshekter. Internet-alaiaqtyqtyń túr-túri bar. Sońǵy ýaqytta áleýmettik jeli arqyly «Baier» degen ataýmen Qytai, Túrkiia, AQSh-tan arzan taýar jetkizýshiler kóbeigen. Biri elimizde tirkelip, zańdy jumys istese, endi biri halyqty tolyǵymen aldap júr. (...) Qazir baiytamyn deitin «Baierge» baryn bergen qara halyqtyń bazynasyn da jii estip júr», - dedi depýtat.
Dáýlet Muqaev ózi aitqan málimetterge naqty mysal da keltirdi.
«Solardyń biri – Ais Muratova degen laqap atpen tanymal. Shyn aty – Arailym. Ol sońǵy eki jylda halyqtyń senimine kirip, saýda jasap, ózin jaqsy jaǵynan jarnamalaǵan. Onyń ishinde Qytaidan arzan taýarlar, ydys-aiaqtar jiberemin degen áleýmettik jeli arqyly ózin iri kásipker retinde kórsetip, qol astymda zańdy jumysshylarym bar dep eldi sendirip kelgen. Tólemderdi eshqandai kelisimshartsyz, iaǵni kartalyq shotqa, aýdarma arqyly jiberýdi suraǵan. Basynda az-maz aqshaǵa qajetti taýarlardy jiberip, keiin iri somaǵa jetkende barlyq salymshyny bir kúnde aldap ketken. Sodan beri ne taýar, ne aqsha qaitarylmaǵan. Jelidegi aqparat boiynsha elimizdiń ár óńirindegi 5 myńnan astam azamattan jalpy somasy shamamen 30 mlrd teńge jinap alyp, barlyǵyn aldap ketken. Endi saýda jasap, kún kórmekshi bolǵan azamattar aryz jazyp shaǵymdansaq ta, birneshe aidan beri esh nátije shyqpaidy deidi», - dedi depýtat.
