Qazaqstan keibir elderdiń tájiribesin eskerip, elektr energiiasyn kóp tutynatyn mainin fermalardyń jumysyna tyiym salýy múmkin be? Ortalyq kommýnikatsiialar qyzmetinde ótken brifingide osyndai suraq qoiyldy, dep habarlaidy QazAqparat.
Saýalǵa QR Energetika ministrligi atomdyq jáne energetikalyq qadaǵalaý men baqylaý komitetiniń tóraǵasy Abai Shańǵytbaev jaýap berdi.
«Maining kompaniialarǵa ruqsat bermeý, olardy jumys istetkizbeý degen maqsat joq. Olar da ekonomikanyń bir salasy. Ózderiniń jumys isteitin, qyzmet kórsetetin aimaǵy bar. Sondyqtan energetikterdiń olarǵa kedergi jasap, olardyń jumysyn toqtatý maqsaty joq. Biraq qazirgidei qysqy kezeńde, kásibi tilmen aitsaq, energetikalyq júieniń bar kúshimen jumys isteitin saǵattarynda energiia tutynýdy azaitý máselesi bar», -dedi komitet tóraǵasy.
Atalǵan sharada Energetika ministrliginiń ókili halyqaralyq qarjy uiymdary kómir stansalarynyń qurylysyn qarjylandyrýdan bas tartyp otyrǵanyn aitqan bolatyn.
«Jańartylatyn energiia kózderiniń turaqsyzdyǵyn eskersek, bizge eldiń energiia júiesindegi bazalyq kózderdi qarastyrý kerek. Halyqaralyq qarjy uiymdary kómir stansalaryn salý jobalarynan búkil jerde bas tartyp jatqandyqtan kómir generatsiiasyn ári qarai engizý múmkindigimiz shektelip otyr. Osyǵan bailanysty jiyntyq qýaty 2,4 GVt bolatyn atom elektr stansasy bazalyq generatsiianyń jańa kózi retinde qarastyrylyp otyr», - dedi ministrlik ókili.
