Aýyldardy memlekettik qoldaý túrli baǵdarlamalardyń tasasynda qalyp keledi. Bul týraly QR Parlamenti Senatynyń Tóraǵasy Máýlen Áshimbaev málim etti, dep habarlaidy QazAqparat.
«Aýyl turǵyndarynyń tabys deńgeii tómen ekenin bilemiz. Aýyldan kóshý qarqyny da báseńdemei otyr. Negizinen jastar, eńbekke jaramdy adamdar ketip jatyr. Sonyń saldarynan halyqtyń qartaiý úderisi beleń alýda. Aýyldaǵy eń basty máselelerdiń biri – jumyssyzdyq. Qysqa merzimde oqytý jáne qaita oqytý siiaqty múmkindikter qarastyrylsa da, qazirgi jumyspen qamtý baǵdarlamalary turǵyndardy tolyq qamti almaýda», - dedi M. Áshimbaev Senattaǵy aýyldyq aýmaqtardy damytý jónindegi parlamenttik tyńdaýda.
Onyń aitýynsha, aýyldaǵy kásipkerlik te tiisti deńgeide damymai otyr. 2019 jyldyń qorytyndysy boiynsha aýyldyq jerlerde jumys isteitin 412 myń shaǵyn jáne orta kásipkerlik sýbektisi bar. Bul elimiz boiynsha shaǵyn jáne orta kásipkerlik kóleminiń 31 paiyzyna teń. Alaida, aýyldaǵy kásipkerler shyǵarǵan ónimniń úlesi barlyq shaǵyn jáne orta kásipkerliktiń 14 paiyzyn ǵana quraidy.
«Oǵan burynnan qordalanyp qalǵan máseleler ǵana sebep emes. Aýyldyq aýmaqtardy damytýǵa qatysty memlekettik basqarýdaǵy qazirgi tetikterdiń osaldyǵy da osyǵan ákelip otyr. Ortalyq deńgeide de, jergilikti deńgeide de aýyl damýyn basqarýdyń jáne úilestirýdiń keshendi tásili joq ekenin jii estip kelemiz. Aýyldardy memlekettik qoldaý túrli baǵdarlamalardyń tasasynda qalyp, naqty júrgizilmei keledi. Sondyqtan júieli saiasat qajet. Bul jóninde Memleket basshysy birneshe ret aitqanyn jaqsy bilesizder.
Ol úshin ortalyq memlekettik organdar jergilikti bilik organdarymen birlesip, konstrýktivti jumys júrgizgen jón. Bizder, senatorlar, aýyldy tiimdi damytýǵa arnalǵan zańnamalyq bastamalardy qoldaýǵa daiynbyz», - dedi Senat Tóraǵasy.
Osy oraida, ol aýyldardy saqtaý jáne damytý – ulttyq qaýipsizdikke de qatysty másele ekenin atap ótti. Bul ásirese, qazirgidei syn-qaterler kezeńinde óte ózekti.
«Naqty aitqanda, shekara mańyndaǵy eldi mekenderdi saqtaý asa mańyzdy máselelerdiń biri. Prezidentimiz anyqtap bergen basymdyqtardy iske asyrý jáne aýyldyq aýmaqtardy damytýǵa tyń serpin berý – tiisti memlekettik organdardyń aldynda turǵan negizgi mindet», - dedi M. Áshimbaev.
