QR Parlamenti Senatynyń tóraǵasy Máýlen Áshimbaev Elbasynyń «Abai amanaty» atty maqalasyna orai pikir bildirdi, dep habarlaidy "Ult aqparat".
«Elbasynyń «Abai amanaty» atty maqalasyn bir demmen oqyp shyqtym. Týyndy Tuńǵysh Prezidentimizdiń Abaidy alǵash tanyǵan kezinen bastalyp, uly oishyldyń ósiet sózderimen órilgen. Maqalany oqý arqyly Elbasy ómirine, onyń ishinde el basqarýdaǵy is-áreketine aqynnyń ǵibrattary qanshalyqty áser etkenin burynǵydan da jaqynyraq bildik deýge bolady. Shyn máninde, Nursultan Ábishulynyń ár igi bastamasy danyshpannyń ónegesine taban tireidi. Oǵan Elbasynyń Qazaqstan halqy Assambleiasyn qurý týraly sheshimi Abaidyń «Adamzattyń bárin súi baýyrym dep...» degen qaǵidasymen úndesýi aiqyn dálel», - dep jazdy Senat spikeri Facebook paraqshasynda.
Máýlen Áshimbaev Elbasy maqalada Qazaqstan Respýblikasynyń Prezidenti retindegi ókilettigin óz erkimen toqtatý týraly sheshimdi qabyldamas buryn bolashaqta el tizginin ustaityn azamatqa Abaisha qarap, Abaisha baǵa bergenin aitqanyna nazar aýdartady.
«Osynyń ózi Abai murasynyń máńgilik ekenin dáleldeitin dúnie. Nursultan Ábishuly ǵulamanyń 150 jyldyq mereitoiyn halyqaralyq deńgeide atap ótýdiń eldik, egemendik turǵysynan qanshalyq mańyzdy bolǵanyn da nazardan tys qaldyrmai, sol kezdegi birqatar estelikterge toqtalyp ótken. Oqyp otyryp, Abaidai dara tulǵanyń mereitoiy toi toilaý úshin emes, oi oilaý úshin qajet degen qaǵidanyń durystyǵyna odan ári kóz jetkize túsesiń.
Elbasy maqalada: «Keide bizdiń býyn ómir boiyna uly Abai mektebinen, iaǵni ǵulamanyń muhittai shalqar oi qazynasynan tolassyz bilim alyp kele jatqandai kórinedi», – deidi. Biz osy úrdisti laiyqty jalǵastyrýymyz qajet. Iaǵni, Abaidyń aqyl dariiasy ultymyzdyń búgingi býyny úshin de jáne bolashaq urpaq úshin de ainymas baǵyt-baǵdarǵa, ómirlik shamshyraqqa ainalýy kerek. Bul – kemel keleshektiń birden bir kepili», - dedi Senat tóraǵasy.
