Búgin qazaq tarihyndaǵy eń eleýli datalardyń biri. Sebebi osydan týra 94 jyl buryn, iaǵni 1925 jyldyń 15 sáýirinde Qyzylordada ótken AKSR Qyrǵyz (Qazaq) Keńesteriniń V sezinde halqymyzǵa «qazaq» degen ataýdy qaitarý týraly tarihi sheshim qabyldandy.
Sodan bastap barlyq resmi qujattarda bizge qatysty «qyrǵyz» degenniń ornyna «qazaq» ataýy qoldanylyp, jazyla bastady. Bul táýelsizdik jolynda jasalǵan eń batyl ári asa mańyzdy qadamdardyń biri edi.
Osy bir uly istiń bastaýynda ulttyń ulyq ustazy Ahmet Baitursynovtyń turǵanyn eshqashan esten shyǵarmaýymyz kerek. Ahmet atamyz joǵaryda atalǵan sol bir jiynda qyrǵyz ben qazaqtyń eki bólek ult ekenine nazar aýdaryp, ult atyn jasyrýdy ótken zaman kóterse de, endigi tarihtyń ondai jańsaqtyqty qup kórmeitinin ashyp aitty. Sonyń arqasynda tarihi ádilettilik saltanat quryp, qaitadan qazaq atandyq.
Iá, bir kezderi til, dil, din siiaqty qundylyqtarymyzben birge atymyzdan da aiyrylyp qala jazdaǵan zamandar boldy. Qazir sonyń bári artta qalyp, búkil álemge táýelsiz Qazaq eli retinde tanylyp otyrmyz.
Bizdiń endigi basty mindetimiz – tamyryńdy qiyp, tanymyńdy ózgertip jiberetin qazirgidei jahandaný jaǵdaiynda qazaqtyń atyn máńgilikke saqtap, ultymyzdyń otyn óshirmeý. Ol úshin jas býynnyń sanasyna ult tarihyn tereń sińirip, ulttyq kodtan nár alatyn qundylyqtardy dáripteýdiń mańyzy zor dep bilemin. Tipti álemniń ozyq jańalyqtarynyń ulttyq bolmysymyzben bite qainasýyna da jaǵdai jasaýymyz kerek.
Eń bastysy, barlyq is-áreketimizden qazaqtyǵymyz aishyqtalyp, ulttyǵymyz ulyqtalyp tursa igi. Óitkeni ult úshin ómirin qiǵan ziialylarymyzdyń basty kózdegeni sol bolatyn.
Osyǵan bailanysty kelesi jyly 95 jyl tolatyn atalǵan oǵiǵanyń mańyzyn arttyryp, 15 sáýirdi tarihi ádilettilik saltanat qurǵan kún retinde atap ótsek te esh artyq emes dep esepteimin.
Mundai bastama «Rýhani jańǵyrý» baǵdarlamasyn da jańa mazmunmen toltyra túsetini sózsiz.
Máýlen Áshimbaevtyń feisbýktegi jazbasynan
