Uly Abaidyń 175 jyldyǵy aiasynda aqynnyń ózbek tiline aýdarylǵan shyǵarmalary men shyǵystyń ǵulama shaiyry Álisher Naýaidiń qazaq tilinde jaryq kórgen «Hamsa» atty kitaby kópshilikke tanystyryldy, dep habarlaidy "Ult aqparat" joǵary palatanyń baspasóz qyzmetine silteme jasap.
Kitaptardyń tusaýkeser rásimine Qazaqstan Respýblikasy Parlamenti Senatynyń tóraǵasy Máýlen Áshimbaev, Ózbekstannyń Olii Májilis Senatynyń tóraiymy Tanzila Narbaeva, Halyqaralyq Túrki akademiiasynyń prezidenti Darhan Qydyráli, Túrkiia, Ózbekstan, Qyrǵyzstan elderiniń Qazaqstandaǵy elshileri, Májilis depýtattary jáne birqatar aqyn-jazýshy men ziialy qaýym ókilderi qatysty.
Máýlen Áshimbaev bul kúnniń qazaq jáne ózbek ádebieti úshin, sondai-aq, tutas túrki jurty úshin mańyzy zor ekenin aitty.
«Abai qazaqtyń ǵana aqyny emes. Ol – barsha adamzatqa ortaq ǵulama. Aqynnyń oi-tolǵamdary men ósieti barsha túrki jurtyna arnalǵan desek te, artyq bola qoimas. Qazirgidei syn-qaterler zamanynda biz osyndai ortaq qundylyqtarymyzdy keńinen dáripteýimiz kerek. Ásirese, jas býynǵa jan- jaqty nasihattasaq, túrki dúniesiniń birligin nyǵaitýǵa qosylǵan úlken úles bolar edi», – dedi Senat tóraǵasy.
Sonymen qatar ol Abai men Naýai muralarynyń rýhani sabaqtastyǵyna nazar aýdardy.
«Shyǵys shaiyrlarynyń dara tulǵasy, ejelgi túrki ádebietiniń atasy Álisher Naýaidiń eńbegin qazaq tiline aýdarýdy mańyzdy oqiǵa dep qabyldaimyz. Bul – qazaq ádebietine qosylǵan qundy úles. Abai Naýaidi óziniń rýhani ustazy sanap, onyń óleńderinen taǵylym alǵanyn bárimiz jaqsy bilemiz. Osy turǵydan kelgende, eki birdei kemeńgerdiń eńbekterin
qatar aýdarýdyń simvolikalyq máni bar», – degen Máýlen Áshimbaev Naýai poeziiasynyń mańyzy men álemdik ádebiettegi orny týraly da sóz qozǵady.
Saltanatty rásim kezinde Ózbekstan Olii Májilisi Senatynyń tóraiymy Tanzila Narbaeva, Ózbekstannyń Qazaqstandaǵy Tótenshe jáne Ókiletti Elshisi Saidikram Niiazhodjaev, Májilis depýtaty Saýytbek Abdrahmanov jáne aqyn Nesipbek Aituly sóz sóilep, mundai sharalar túrki áleminiń yntymaǵyn nyǵaita túsetinin aitty.
«Hamsa» – Álisher Naýaidiń áigili bes dastannan turatyn eńbegi. Qazaq tilinde jaryq kórgen kitapqa «Láili-Májin» jáne «Eskendir qorǵany» atty eki dastan engen. Bul shyǵarmalardy kóne ózbek tilinen qazaqtyń belgili aqyny Nesipbek Aituly aýdardy. Shalqar shabytpen, asqan sheberlikpen tárjimalanǵan jaýhar týyndylar baýyrlas eki el arasyndaǵy ádebi jáne mádeni bailanystardyń altyn kópirine ainalary sózsiz.
Atalǵan igilikti iske Halyqaralyq Túrki Akademiiasy uiytqy boldy. Osy rette Akademiianyń muryndyq bolýymen buǵan deiin de bul baǵytta birqatar mańyzdy bastama júzege asyrylǵanyn atap ótken jón.
