16 qazan kúni Máskeýde qazaq ádebietiniń orys tilindegi antologiiasyn aýdarý, basyp shyǵarý men taratý jumystaryna qatysty kelissózder aiaqtaldy, dep habarlaidy "Ult aqparat".
Naqtyraq aitsaq, "Qazirgi qazaq prozasynyń antologiiasy" men "Qazirgi qazaq poeziiasynyń antologiiasyn" orys tiline aýdaryp, basyp shyǵarýǵa M.Lomonosov atyndaǵy Máskeý memlekettik ýniversitetiniń baspa úii, sondai-aq Resei Jazýshylar odaǵynyń Máskeý qalalyq uiymy atsalysady.
Qazirgi zamanǵy qazaq ádebietiniń úzdik úlgileri jinaǵyn BUU-nyń 6 tiline aýdarý Qazaqstan Respýblikasynyń Prezidenti N.Á.Nazarbaevtyń bastamasymen qolǵa alynǵan "Rýhani jańǵyrý" baǵdarlamasy aiasynda júzege asyp jatqany málim. Baǵdarlamanyń mańyzdy baǵyttarynyń biri – "Jahandaǵy zamanaýi qazaqstandyq mádeniet". Onyń maqsaty – zamanaýi qazaq ádebietiniń, mýzykasy men beineleý óneriniń jaýharlaryn, kino men teatr, horeografiia salasynyń táýelsizdik jyldaryndaǵy tabystaryn dúnie júzine tanystyrý.
Memorandýmǵa qol qoiý rásimi Qazaqstannyń Reseidegi elshiliginde, Qazaqstan Respýblikasynyń Resei Federatsiiasyndaǵy Tótenshe jáne ókiletti elshisi I.N.Tasmaǵambetov pen "Ulttyq aýdarma biýrosynyń" direktory R.Kenjehanulynyń qatysýymen ótti. Qazaqstan tarapynan memorandýmǵa "Rýhani jańǵyrý" baǵdarlamasyn júzege asyrý jónindegi ulttyq komissiianyń hatshysy Aida Balaeva qol qoidy.
Rásim barysynda A.Balaeva: "Qazaqstannyń burynnan senimdi seriktigi, áriptesi Máskeý memlekettik ýniversiteti men Resei jazýshylar qaýymynyń ortalyq aimaqtaǵy iri uiymynyń mol tájiribesi men joǵary bedeliniń arqasynda jobamyzdyń sátti júzege asatynyna, iaǵni qazaq ádebietiniń orys tiline aýdarmasynyń sapasy joǵary bolatynyna ári basylym orystildi keńistikte keń taralatynyna senimdimin, – dep jyly lebizin bildirdi.
Óz kezeginde Máskeý memlekettik ýniversiteti janyndaǵy baspa úiiniń direktory Aleksandr Veraksa ýniversitet baspasy jobanyń sátti júzege asýyna oqý ornynyń talai jylǵy tájiribesine arqa súiep bar kúshterin salatynyn jetkizdi. Al, Resei Jazýshylar odaǵy Máskeý qalalyq uiymynyń tóraǵasy Vladimir Boiarinov aýdarmany antologiiaǵa daiyndaý barysy Qazaqstan men Resei qalamgerleri arasyna altyn arqaý bolyp, ózara mádeni yqpaldastyqqa oń áserin tigezetinine úmiti zor ekenin aitty.
Memorandýmda kórsetilgen yntymaqtastyq aiasynda Resei Jazýshylar odaǵynyń Máskeý qalalyq uiymy ádebi jinaqtarǵa suryptalǵan shyǵarmalardyń kórkem aýdarmasymen jáne ony redaktsiialaýmen ainalysady. Al, Máskeý memlekettik ýniversitetiniń baspa úii antologiiany basyp shyǵarýdy, sondai-aq onyń orystildi oqyrmandarǵa taratýdy, nasihattaýdy uiymdastyrady.
Aita ketsek, qazirgi zamanǵy qazaq ádebietiniń jaýharlaryn BUU-nyń 6-tiline (aǵylshyn, arab, ispan, qytai, orys, frantsýz tilderi) aýdarý "Jahandaǵy zamanaýi qazaqstandyq mádeniet" jobasy aiasynda qolǵa alynyp otyr. Joba óz kezeginde, Qazaqstan Prezidenti N.Á.Nazarbaev bastamashy bolǵan «Rýhani jańǵyrý» baǵdarlamasynyń aýqymdy baǵyttarynyń biri sanalady.
Jobanyń maqsaty – dúnie júzine ádebiet, mýzyka, beineleý óneri, horeografiia, kino jáne teatr salalaryndaǵy táýelsizdik jyldary qol jetkizgen jetistikterimizdi tanystyryp, meilinshe keń nasihattaý. Qazirgi qazaq ádebietiniń qos antologiiasyn daiarlaý boiynsha uiymdastyrý jumystary áldeqashan bastalyp ketti. Olardyń bireýi – "Qazirgi qazaq prozasynyń antologiiasy", ekinshisi – "Qazirgi qazaq poeziiasynyń antologiiasy" dep atalady. Ár antologiianyń kólemi – shamamen 600 bet. Árqaisysyna 30 avtordan enedi. Antologiianyń mazmuny men qurylymy Qazaqstan Jazýshylar Odaǵynda ótken arnaiy májiliste bekitilgen.
Búgingi tańda jobanyń barlyq basty seriktesterimen kelissózder aiaqtala keldi. Mysaly, basylymnyń aǵylshyn tilindegi nusqasyn ázirleýge Kembridj ýniversitetiniń baspasy, ispan tilindegisine – Ispaniianyń mádeniet ministrligi jáne Servantes institýty, frantsýz tilindegisine – Parij meriiasy men Frantsiianyń Ulttyq kitap ortalyǵy qatysady. Al qytai tilindegi nusqasy daiarlaýǵa QHR Ulttar baspasy atsalysady.
