Foto: Kp.kz
Búgin kórnekti aqyn, jazýshy Oljas Súleimenov 90 jasqa tolyp otyr, dep habarlaidy Ult.kz.
Oljas Súleimenov – Qazaqstannyń Halyq jazýshysy, Eńbek Eri, diplomat ári túrki áleminiń tanymal oishyldarynyń biri. Onyń shyǵarmashylyǵy men qoǵamdyq qyzmeti qazaq ádebieti men mádenietiniń damýyna zor yqpal etti.
Ásirese qalamgerdiń «Az i Ia» atty eńbegi ulttyq tarih, til jáne rýhani mura máselelerin tereń zerttegen mańyzdy týyndy retinde baǵalanady. Sondai-aq ol halyqaralyq Nevada – Semei antiiadrolyq qozǵalysynyń bastamashysy retinde álemge tanyldy.
Mádeniet jáne aqparat ministrliginiń málimetinshe, jazýshynyń shyǵarmashylyq murasyn nasihattaý jumystary jalǵasyp jatyr. Buǵan deiin qalamgerdiń qazaq jáne orys tilderindegi on tomdyq shyǵarmalar jinaǵy jaryq kórgen.
Al mereitoi aiasynda jyl sońyna deiin «Oljas Súleimenov. 90 jyl» jáne «Az i Ia» fotoalbomdaryn shyǵarý josparlanǵan. Keiin bul jinaqtar elimizdiń barlyq kópshilik kitaphanalaryna taratylmaq.
Sonymen qatar respýblika kóleminde aqynnyń shyǵarmashylyǵy men qoǵamdyq qyzmetine arnalǵan túrli mádeni is-sharalar uiymdastyrylady.
Qazaqstan Respýblikasynyń Mádeniet jáne aqparat ministrligi Oljas Súleimenovti 90 jyldyq mereitoiymen quttyqtap, onyń shyǵarmashylyq murasy keler urpaqqa rýhani qundylyq bolyp qala beretinin atap ótti.
