Jetisý oblysynyń jazýshysy Esbolat Aidabosynnyń «Búkir» romany respýblikalyq Mecenat.kz ádebi baiqaýynda jeńimpaz atandy. Endi avtor ómir boiy ai saiyn 500 dollar kóleminde syiaqy alyp otyrady, dep habarlaidy ult.kz.
Biyl besinshi ret uiymdastyrylǵan baiqaýǵa 33 qoljazba usynylǵan. Qazylar alqasy olardyń arasynan «Búkir» romanyn úzdik dep tanyǵan. Jobanyń demeýshisi Freedom Bank jeńimpazǵa ómir boiy ai saiyn 500 dollar kóleminde syiaqy taǵaiyndaǵan.
Jazýshyny jeńisimen Jetisý oblysy ákiminiń orynbasary Dias Esdáýletov quttyqtady. Ol bul jetistikti avtordyń kóp jylǵy eńbegi men kásibi sheberliginiń nátijesi dep baǵalap, jazýshyǵa estelik syilyq tabystady.
Esbolat Aidabosynnyń aitýynsha, «Búkir» romany kútpegen jerden jazylǵan. Avtor kólemdi shyǵarmamen jumys isteýden sharshaǵan soń, bul týyndyny nebári eki-úsh aida aiaqtaǵan. Roman eki birdei baiqaýda moiyndalyp, oqyrman arasynda da qyzyǵýshylyq týdyrǵan.
Qazir kitap ATA Creative Hub baspasynan jaryq kórip, satylymǵa shyqqan. Ony Qazaqstandaǵy kitap dúkenderinen jáne onlain platformalardan satyp alýǵa bolady. Kitaptyń tusaýkeseri Almaty, Uzynaǵash jáne Jetisý oblystyq kitaphanasynda ótken.
Jazýshy aldaǵy ýaqytta da shyǵarmashylyq jumysyn jalǵastyratynyn aitady. Onyń pikirinshe, kitap jazýmen ǵana shektelmei, shyǵarmalardy oqyrmanǵa jetkizý, nasihattaý jáne olardyń negizinde filmder men spektaklder túsirý mańyzdy.
Aidabosyn «Oqityn ult» tujyrymdamasy qazaq ádebietine jańa serpin bergenin atap ótti. Onyń sózinshe, jazylǵan kitap oqyrmanǵa jetýi kerek. Al baspalar, kitaphanalar men ádebi agentter avtor men oqyrman arasyndaǵy bailanysty qamtamasyz etýi qajet.