Mihail Kozachkov Telegram-arnasynda halyqaralyq izdeýde júrgen kásipker Azamat Qapenovtiń azamattyǵy men tólqujattaryna qatysty máselelerge nazar aýdardy, dep habarlaidy ult.kz.
Kozachkovtyń jazýynsha, Kárim Másimovtiń burynǵy kúieý balasy Azamat Qapenovke Qazaqstanda alaiaqtyq jáne qyzmettik ókilettikterin teris paidalaný boiynsha kúdik keltirilgen. Tergeý málimetinshe, keltirilgen shyǵyn kólemi 5 milliard teńgeden asady. Isti Qazaqstannyń Qarjylyq monitoring agenttigi tergep jatyr.
Sonymen qatar, jaqynda Máskeý soty Qapenovti qazaqstandyq kásiporyndaǵy úlesti jymqyrdy degen kúdikpen syrttai qamaýǵa alý týraly sheshim shyǵarǵan.
Avtordyń málimetinshe, qazirgi ýaqytta Azamat Qapenov Qyrǵyzstan aýmaǵynda júr jáne ózin osy eldiń azamaty retinde tanystyrady. Bul jaǵdai onyń Qazaqstanǵa nemese Reseige ekstraditsiialaný protsesin qiyndatýy múmkin.
Mihail Kozachkovtyń deregine sáikes, Azamat Qapenov 1978 jyly Qyrǵyzstannyń Qarakól qalasynda dúniege kelgen, keiin Almatyǵa kóship kelip, 2001 jyly Qazaqstan azamattyǵyn alǵan. Sol kezde tarihi otanyna oralý negizinde Qazaqstan azamattyǵyn rásimdegendikten, Qyrǵyzstan azamattyǵynan bas tartýy tiis bolǵan.
Mihail Kozachkovtyń Telegram-arnasynnan
Alaida jýrnalistiń aitýynsha, Qapenov qazirgi ýaqytta Qyrǵyz Respýblikasynyń jaramdy tólqujatyna ie. Bul jaǵdai onyń azamattyq mártebesine qatysty suraqtar týyndatyp otyr.
Kozachkov Qyrǵyzstannyń «Azamattyq týraly» zańyna silteme jasap, shekaralas memleketterdiń azamattyǵyn alǵan azamattardyń belgili bir jaǵdailarda Qyrǵyzstan azamattyǵynan aiyrylatynyn atap ótedi. Osyǵan bailanysty avtor Qapenovtiń Qazaqstan azamattyǵyn alǵan kezeńde Qyrǵyzstan tólqujatyn saqtap qalýy zań talaptaryna qanshalyqty sáikes kelgeni tekserilýi tiis dep esepteidi.
Sondai-aq jýrnalist Azamat Qapenovtiń áleýmettik jelidegi paraqshasynda ózin Qyrǵyzstan azamaty bolyp týǵanyn jáne bul azamattyqtan eshqashan shyqpaǵanyn málimdegenine nazar aýdarǵan.
Mihail Kozachkov jariialanymynyń sońynda Qyrǵyzstannyń quzyrly organdary bul máselege qandai quqyqtyq baǵa beretinin kútý qajet ekenin atap ótken.
Aita keteiik, atalǵan aqparat Mihail Kozachkovtyń Telegram-arnasynda jariialanǵan. Resmi memlekettik organdar ázirge Kapenovtiń Qyrǵyzstan azamattyǵy nemese tólqujattarynyń zańdylyǵyna qatysty qosymsha túsinikteme bergen joq.
