Elimiz boiynsha mektepterde 250 myńnan astam oryn tapshylyǵy bar. Bul týraly QR Oqý-aǵartý ministri Ashat Aimaǵambetov aitty, dep habarlaidy QazAqparat.
«Endi 2023 jyldan bastap salynatyn mektepter memlekettik standarttarǵa sai bolýy qajet. Eger robototehnika, fizika, himiia pándik kabinetteri qajet bolsa, onda mektepti soǵan sai jabdyqtaý kerek. Qazirgi ýaqytta mektep salynyp bitedi de, litsenziia alýǵa kelgende barlyq qajetti qural-jabdyqtyń jetispeitini belgili bolatyny jasyryn emes. Máselen, sport zalyn alatyn bolsaq, qazirgi ýaqytta 1 200 oqýshyǵa arnalǵan óte úlken mektepter salynyp jatyr. Eki aýysymdy eseptesek, 2 400 oqýshy oqidy. Biraq ol mektepte tek bir ǵana sport zaly qarastyrylǵan. Al eger tiptik oqý baǵdarlamasyn qaraityn bolsaq, aptasyna ár synypta úsh saǵat dene shynyqtyrý sabaǵy bar. Sol úsh saǵatty barlyq synypqa sanaityn bolsaq, onda bir sport zaly jetispeidi jáne bir ýaqytta birneshe synyp bir sport zalynda shynyǵady. Sondyqtan birneshe sport zaly kerek. Nelikten qazir kóptegen ata-ana balalaryn memlekettik-jekeshelik áriptestik boiynsha salynǵan jańa mektepterge berýge umtylady? Sebebi olar tolyq jabdyqtalǵan jáne standarttarǵa sai. Sondyqtan bizge osyndai mektepter qajet», - dedi Ashat Aimaǵambetov.
Ministr «Qolaily mektep» jobasynda qurylys materialdarynyń sapasy jáne bastaýysh pen joǵary synyp oqýshylaryn bloktarǵa bólý máselesi de qarastyrylatynyn aitty.
«Bul joba boiynsha bizde qosymsha 800 myńnan astam oryn beriledi jáne joǵaryda aitylǵan máseleler sheshimin tabady. Búgingi tańda elimiz boiynsha mektepterde 250 myńnan astam oryn tapshylyǵy bar. Eger biz osy máseleni qazir sheshpesek, 2026 jylǵa qarai jalpy tapshylyq 1 mln 200 myńǵa deiin jetedi. Byltyr biz Prezidenttiń tapsyrmasy aiasynda 277 mektep saldyq. Biyl 225-ten asa mektep salǵaly otyrmyz. Mektep qurylysy men qarjylandyrýdy ákimdikter júrgizedi», - dedi ministr.
