Álimizge qaramai, osy tóńirektegi máselelerdi qashannan-aq qozǵap júrmiz ǵoi. «Kóksandyǵyńyzdyń» (teledidar) kóp bolsa otyz paiyzy ǵana paidaly, qalǵany qas dushpannan beter. Dedik. Baiaǵyda. Ǵalamtoryńyz aramtorlanyp alyp, sanalardy jappai jaýlai bastaǵanda, «Órkeniet pen kórkemniet» degendi mánistedik. Shyryldap. Ókinishke qarai, biz paqyryńyzdyń shyryl-pyrylymyz kimge dári…
Marhabat BAIǴUT,
jazýshy
Ǵalamtordyń aramtorlyǵyn aitýshylar aramter. Jazylyp ta jatyr. Amal qansha. Qazirgi kezeńdegi keselderdiń, kesir-kesapattardyń bári kórkemdik-estetikalyq tálim-tárbieniń keri ketýinen. Internet itermelep itjúrektendirdi. Birneshe urpaqty. Saittar sanalardy jaýlap, ýlap jatyr. Kitaptan, kórkem ádebietten ádeiilep bezindirý bar. Degenmen…
Ońtústikte sózden iske kóshýdiń ájepteýir áreketteri baiqalady. Oblystyq «Otyrar» kitaphanasynda «Oqyrmandar otaýy» jumys isteidi. Osy otaýdyń batyl bastamalaryn Pýshkin atyndaǵy oblystyq jáne Abai atyndaǵy qalalyq kitaphanalar qoldap, jalǵastyryp áketedi. Úsheýiniń úilesimdi tirligin Qairat Rysqulbekov atyndaǵy jasóspirimder jáne Ybyrai Altynsarin atyndaǵy balalar kitaphanalary da qoldap, qýattap otyrady. Osylaisha birneshe joǵary jáne arnaýly orta oqý oryndary, ondaǵan mektepter kórkem ádebietke, kitapqa birte-birte betburys jasaýda. Túlkibas aýdanynda tórt-bes jyldan beri arnaiy oqýlar uiymdastyrylyp keledi.
Eger eren eńbekten, talapshyldyqtan qashpasa, shynaiy qulshynys bolsa, kitaphanashylar men muǵalimder aǵartýshylyq paryzdaryn patriottyqpen sezinse, balalardy baýrai bilse, biraz nárseler tyndyra alady eken. Qury bosqa qurydyq dei bersek, qurdymǵa ketýimiz múmkin.
Bir kezderi KazGÝ-ińizdiń filologiia fakýltetindegi Sagalovich deituǵyn sulý apaiymyz ataqty shyǵarmalardy kinofilmder boiynsha zaýlatatyndarǵa «eki» qoiyp, kitaptan oqyǵany bilinip turatyndarǵa riiasyz rizalyq tanytatyn. Dál qazir barlyq mektepter men ózge de oqý oryndarynda tap osyndai talap qoiý qajet-aq. Qytaida, t.b. birqatar elderde ǵalamtordyń aramtorlyǵyna shekteý qoiatyn zańdar qabyldanǵaly qashan. Qazaqtyń qozǵalar túri joq.
Biz taǵy da birazyraq buryn, álimizge qaramai, «Abaidy oqy, orynda!» degen másele kóterdik. Hakimniń: «…barlyq nárseniń de ólsheýi bar. Ólsheýinen asyrsa, boǵy shyǵady» degenin eń aldymen júzeleýge tiispiz. Internet jóninde de sózden iske kóshpesek, boqqa batqanymyz – batqan.
