Ulttyq qoǵamdyq senim keńesiniń múshesi, Eýropalyq quqyq jáne adam quqyqtary institýtynyń direktory Marat Báshimov Prezident karantin sharalaryn eki aptaǵa uzartý tapsyrmasyna qatysty pikir bildirdi, dep habarlaidy QazAqparat.
«Mamyr aiynda shekteý sharalaryn jeńildettik te elde indet qaita órship ketti. Shilde aiynyń basynda engizilgen karantin sharalary tamyzdyń basyna deiin uzartyldy. Bizdiń el sekildi basqa memleketter de amalsyz karantin merzimin uzartyp jatyr. Óitkeni ol elderde de, bizdiń memlekette de pozitiv bar desek te indettiń beti áli qaita qoiǵan joq. Memlekettik organdar da aiylyn jiyp, halyq ta nazaryn bul máselege kóbirek bura bastady. Prezidenttiń buǵan deiin Úkimetke jasaǵan eskertýin bilesizder. Áitse de bizdiń elde indetti eńserdik dep aita almaimyz. Sebebi kúnine 1500-ge tarta adamnan koronavirýs anyqtalýda», - dedi Marat Báshimov QazAqparat tilshisine telefon arqyly aitqan pikirinde.
Onyń aitýynsha, Prezidenttiń karantin sharalaryn eki aptaǵa uzartýy – óte mańyzdy ári kerekti sheshim.
«Óitkeni qazir jaǵdaidy baqylaýdan jiberip alsaq, virýs qaita órship ketýi múmkin. Halyqqa kiná artyp jatqandardyń pikirimen kelise qoimaimyn. Áitse de virýsqa áli de senbei júrgender bar. Ókinishtisi, kóshede maskasyz, áleýmettik qashyqtyqty saqtamai júrgenderdi áli kórip júrmiz. Sondyqtan karantin sharalaryn menińshe qatań saqtaýdy eki aptaǵa taǵy uzartý kerek. Bul durys sheshim», - dep qaitalady sózin ol.
