Foto: Beineý ákimdigi
Mańǵystaý oblysynda dala órkenietiniń kóne izi sanalatyn Qaraqabaq qalashyǵynda arheologiialyq zertteý jumystary jalǵasýda, dep habarlaidy Ult.kz.
Mańǵystaý oblysynyń ákimi Nurdáýlet Qilybai Á.H.Marǵulan atyndaǵy Arheologiia institýty direktory Aqan Ońǵaruly jáne arheolog Andrei Astafevpen birge Túpqaraǵan aýdanyndaǵy Qaraqabaq qalashyǵyna baryp, arheologiialyq qazba jumystarymen tanysty.
Aldymen delegatsiia Á.Kekilbaiuly atyndaǵy Mańǵystaý oblystyq tarihi-ólketaný mýzeii qorynda saqtalǵan Qaraqabaqtan tabylǵan tarihi jádigerlerdi kórdi. Keiin arheologiialyq nysanda júrgizilip jatqan ǵylymi-zertteý jumystarynyń nátijeleri talqylandy.
Mamandardyń málimetinshe, Qaraqabaq qalashyǵy bizdiń zamanymyzdyń I–VI ǵasyrlaryna jatatyn kóne saýda jáne qolóner ortalyǵy bolǵan. Ǵalymdar bul óńir arqyly 2000 jyl buryn halyqaralyq saýda bailanystary júrgenin aitady.
Arheologtardyń paiymdaýynsha, Qaraqabaq Uly Jibek jolynyń soltústik tarmaǵyndaǵy mańyzdy teńiz-qurlyq saýda toraby retinde Kaspii mańy elderiniń saiasi jáne ekonomikalyq qatynastarynda erekshe ról atqarǵan.
Qalashyqtan Vizantiia, Úndistan, Rim, Parsy jáne Qytaimen bailanysty dáleldeitin tiyndar, mórler, qysh ydystar men basqa da tarihi jádigerler tabylǵan. Sonymen qatar kóne porttyń izderi, qolóner óndirisi men teńiz saýdasyna qatysty mańyzdy derekter anyqtalǵan.
Óńir basshysy Nurdáýlet Qilybai Qaraqabaqtyń tarihi mańyzy zor ekenin atap ótti. Onyń aitýynsha, bul jańalyqtar Mańǵystaýdyń kóne órkenietter men halyqaralyq saýda júiesindegi ornyn aiqyndai túsedi.
– Qazirgi tilmen aitqanda, bul óz dáýiriniń iri logistikalyq haby bolǵan. Bul derekter ata-babalarymyz tek kóship-qonyp, mal sharýashylyǵymen ainalysty degen túsinikti joqqa shyǵarady. Kerisinshe, munda úlken saýda ainalymy júrgenin dáleldeidi, – dedi ákim.
