Tildiń de mamonty bolady. Ǵylymda ólgen iaki ólý aldyndaǵy tilderdi solai ataidy.
Álemde jyl saiyn birneshe til joiylyp ketedi. Óziniń myńdaǵan jyldyq qalyptasý tarihyna qoldy bir siltep, qulpytasqa ainalyp, joq bolady. Afrika men Aziia, Eýropa men Amerikada bul úrdis úzdiksiz júrip jatyr.
Bir tildiń joiylýy qandai qaiǵy? Odan asqan qasiret joq shyǵar myna ómirde?..Bir til joiyldy - demek bir ult joiyldy. Sol ult qalyptastyrǵan mádeniet, tarih joq boldy degen sóz.
Afrikany alyp qaraiyqshy. Bishýo tilinde - 1, beraký tilinde - 2, nlýý tilinde - 3, mabire tilinde - 3, baldemý tilinde - 5, ndai tilinde - 5, ndjerep tilinde - 6, mpre jáne masalat tilderinde - 10-12 adam sóileidi. Ol adamdar ólgen sátte, bul tilder de joiylady. Myna álem tipti ondai tildiń bolǵanyn da umytyp ketedi. Óitkeni osy ýaqytqa deiin joiylǵan 2000-nan astam tildiń qaisysyna qaiǵyryp, aza tutqan edik?! Sondyqtan til joiyldy degende, ult joiyldy deý kerek.
Qandai tilder joiylady? Birde-bir ǵylymi eńbek jazylmaǵan, birde-bir memlekettik zań qabyldanbaǵan, sóileý aiasy kúibeń tirliktiń deńgeiinen kóterilmegen tilder sózsiz joiylady. Ýaqyt keńistigine bailanysty jańa sózdermen tolyqpaǵan kedei tilder joq bolady. Sondyqtan qazaq tilin ǵylym tiline ainaldyrý asa mańyzdy. Qazaq tiline sapaly túrde kitaptardy aýdarý - sonyń bastamasy. Qazirgi "100 kitap jobasynyń" kitaptaryna osy turǵydan riza boldym. Endigi tańda memlekettik qujattar men zańdardyń barlyǵy derlik memlekettik tilde qabyldanýy qajet. Sonda ǵana qazaq tiliniń róli arta túspek. Bizdiń til "mamont tilder" qatarynan tabylmasyna senemin, alaida onyń tek qana kúibeń tirliktiń tili bolyp qalýyn qalamaimyn.
Ashat Qasenǵalidyń feisbýktaǵy jazbasynan
