QR Premer-Ministri Asqar Mamin Túrkiia Respýblikasynyń Qorǵanys ministri Hýlýsi Akardy qabyldady, dep habarlaidy "Ult aqparat" primeminister.kz silteme jasap.
Úkimet basshysy Qazaqstan men Túrkiia arasyndaǵy yntymaqtastyqtyń joǵary deńgeiin atap ótti.
«Ekijaqty ózara is-qimyldy keńeitýde bizdiń memleketterimizdiń basshylary arasynda qalyptasqan dostyq qarym-qatynas úlken ról atqarady. Ekijaqty formatta qarqyndy júrgizilip jatqan syndarly dialogpen qatar BUU, IYU, EQYU jáne AYSShK sheńberindegi praktikalyq ózara is-qimyl tabysty damýda», - dedi A. Mamin.
Túrkiia Qazaqstannyń negizgi saýda seriktesteriniń top 10 eliniń qataryna kiredi. Qazaqstan men Túrkiia arasyndaǵy taýar ainalymy 2019 jyldyń qorytyndysy boiynsha $3 mlrd-tan asty. Aǵymdaǵy jyldyń 8 aiynda ekijaqty saýda ótken jyldyń sáikes kezeńimen salystyrǵanda 1,4%-ǵa ósip, $2,1 mlrd qurady, QR Táýelsizdik jyldarynda Túrkiiadan Qazaqstanǵa tikelei investitsiia aǵyny $3,7 mlrd-tan asty.
Taraptar eki eldiń áskeri bilim berý jáne qorǵanys-ónerkásip kesheni salalaryndaǵy yntymaqtastyǵynyń jai-kúii men perspektivalaryn, onyń ishinde túrik kompaniialarynyń QÓK salasynda birqatar investitsiialyq jobalardy iske asyrýyn talqylady.
Kezdesýge QR Qorǵanys ministri N. Ermekbaev pen QR Indýstriia jáne infraqurylymdyq damý ministri B. Atamqulov qatysty.
