Abai atyndaǵy QazUPÝ «Bastaýyshta oqytý pedagogikasy men ádistemesi» kafedrasynyń meńgerýshisi Aziia Jumabaeva «Álippe» jańa oqý baǵdarlamasyna qatysty túsinik berdi, dep habarlaidy QazAqparat.
«Álippe» jańa oqý baǵdarlamasy Ahmet Baitursynulynyń ustanymdary negizinde jasaldy. Sol ustanymdardyń biri – dybyspen jattyǵý. Iaǵni, dybyspen jattyǵý «Álippege deiingi» kezeń mindetterin qoiý men bilim mazmunyn anyqtaýda tikelei basshylyqqa alyndy. Ahmet Baitursynuly balalarǵa aldymen árip kórsetpei turyp, dybyspen jattyqtyrý qajet deidi. Sebebi oqýǵa kelgen balalar sóileýdi bilgenimen, olar óz sózderiniń dybystan turatyndyǵyn bilmeidi. Osy oraida dybysty bilmei turyp, sózdiń ishindegi dybystardy tizbei turyp, oqý men jazýǵa úiretý qiyn. Sondyqtan dybyspen jattyqtyrý qajettigi eskerilip otyr», - dedi A. Jumabaeva Ortalyq kommýnikatsiialar qyzmetinde.
Onyń aitýynsha, Ahmet Baitursynulynyń tájiribe arqyly ózindik bilim alý ustanymy basshylyqqa alyndy.
«Bul turǵyda oqýshyǵa materialdy shaǵyndap berý, betin maqsatqa qarai túzep otyrý degen negizgi qorytyndy qaǵidasy bar. Osy printsipterdiń barlyǵy jańa «Álippe» oqý baǵdarlamasynyń qurlymdyq, mazmundyq bolmysyn anyqtaýda, odan keiin olardyń árbir kezeń boiynsha maqsat-mindetterin qoiýda, bilim mazmunyn aiqyndaýda basshylyqqa alyndy», - dedi kafedra meńgerýshisi.
Óz kezeginde M.Áýezov atyndaǵy Ádebiet jáne óner institýtynyń direktory Kenjehan Matyjanov «Álippe» uǵymy qazaq halqynyń túsinigi men dúnietanymynda qasterli pán retinde qalyptasyp qalǵanyn atap ótti.
«Eger árbir azamat alǵashqy muǵalimin qanshalyqty qadirleitin bolsa, qazaq azamaty «Álippeni» de sondai qadir tutatyn bolǵan. Sondyqtan «Álippe» kún tártibinen túsip qalǵan kezde búkil halyq bolyp osy oqýlyqty izdedi. Al endi «Álippeni» qaitarý - qazaqtyń rýhani álemindegi jańa oqiǵa siiaqty kórinip otyr... Osynyń barlyǵynyń qazirgi kezeńge qaityp kelýi – ulttyq rýhymyzdy kóterýge erekshe áser etedi. Alǵash oqýlyqty «a» árpinen bastaǵannan balanyń júreginde ulttyq rýh qalyptasatyn bolsa, ol azamat erteń óz eliniń úlken patrioty bolatyny aidan anyq. Sondyqtan áripterdiń, dybystardyń rettiliginiń bári Ahmet Baitursynuly anyqtaǵan ustanymdarmen sáikes kelýi – bul jańa «Álippeniń» úlken ulttyq rýhtaǵy jańalyǵy dep aitýǵa bolady», - dedi K. Matyjanov.
Budan buryn habarlanǵandai, «Álippeni» engizý 2021-2022 jylǵa josparlanǵan.
Biyl tamyz aiynda QR Bilim jáne ǵylym ministri Ashat Aimaǵambetov ózgeristiń aiasynda mektep baǵdarlamasyna sáikes, 1-synyptarǵa 1-2 toqsan «Álippe», 3-4 toqsan «Ana tili» engiziletinin aitqan edi.
